Dadgehê heqê wergêr bi Midûrê Karên Nivîsê yê berê yê Rojnameya Azadiya Welat Îsmaîl Çoban da razandin. Dozgeriya Komarê ya Amedê di sala 2014’an de ji ber 15 nûçeyên di 9 hejmarên cuda yên rojnameyê de, bi îdiaya “propagandaya rêxistinê” der barê Çoban de îdianeme amade kiribû. Dadgeha Cezayê Giran a 7’an a Amedê jî di sala 2018’an de bi heman îdiayê 5 sal ceza li Çoban birîbû. Lê piştî ku Çoban îtiraz kiribû, Daîreya Ceza ya 3’yan a Herêmê ya Dîlokê biryara dadgehê xera kiribû.
Piştî vê biryarê danişîna dozê ji nû ve dest pê kiribû. Çoban jî ku ji ber dosyeyeke din girtiye û di Girtîgeha Hejmar 3 a Tarsûsê de ye, bi rêya SEGBÎS’ê tevli danişînê bûbû. Çoban, xwestibû bi kurdî parastina xwe bike, lê serokê dadgehê daxwaza wî qebûl nekiribû û di zabitnameyê de “Bersûc pirsên serokê dadgehê yên bi tirkî bi zimanekî nehatiye fêmkirin bersivand” nivîsîbûn.
Di danişîna dawîn a dozê de ku di 21’ê hezîrana 2021’ê de hat lidarxistin, Çoban cardin bi kurdî parastina xwe kiribû û diyar kiribû ku nûçeyên wekî sûc tên hesibandin di çarçoveya kar û barên rojnamevaniyê de ne û lewma ne sûc in. Çoban, berata xwe xwestibû. Lê dadgehê 4 sal û 6 meh ceza li Çoban birîbû.
Dadgehê di biryara xwe de 600 TL heqê pêzaniyê, 50 TL heqê sarfê, 350 TL heqê wergêr û 5.50 TL heqê teblîxatê jî di nav de bi giştî hezar û 5 lîre û 50 qurîş mesrefên darizandinê bi Çoban da razandin.
Çavkanî: Ajansa Mezopotamya
