Yekitiya Şaredariyan a Kantona Cizîrê li bajarê Hesekê daxuyaniyek da û êrişên dewleta tirk û hedefgirtina binesaziya herêmê şermezar kirin.

Cîgira hevserokatiya Yekitiya Şaredariyan a Kantona Cizîrê Bêrîvan Omer daxuyanî xwend. Endamên yekitiyê yên bajarên Qamişlo û Hesekê tev li daxuyaniyê bûn.

Di daxuyaniyê de hate diyarkirin ku dewleta tirk bi hezar 168 êrişan, binesaziya herêmê û navendên xizmetguzariyê û yên stratejîk, parzûngehên petrolê, stasyonên veguhastina kehrebeyê, firin û depoyên ard bombebaran kirin.

Di daxuyaniyê de hate destnîşankirin ku ji ber êrişan, sotemenî negihaşt navendên xizmetguzariyê bi taybet stasyonên ava vexwarinê ku di encamê de gelek jê rawestiyan.

Di daxuyaniyê de hate aşkerakirin ku di encama êrişan de 604 bîrên ava vexwarinê rawestiyan, endamekî tîma Agirkujiyê jî dema ku hewl dida şewatên ji ber êrişan vemirîne, birîndar bûye.

Di daxuyaniyê de hate gotin ku şaredariyên kantona Cizîrê dê bi hemû hêza xwe hewl bidin ku xizmetên girîng ji şêniyan re pêşkêş bikin.

Yekitiya Şaredariyan di daxuyaniya xwe de êrişên dewleta Tirk şermezar kirin, Hêzên Sûriya Demokratîk (HSD) û Hêzên Ewlekariya Hundirîn silav kir.