Îtîfaqê Kurdîstanî seba veradayîşê Rayberê Şarê Kurdî Abdullah Ocalanî û tepişteyanê sîyasîyan veng da.
Îtîfaqê Kurdîstanî yo ke 9 partî û rêxisinan ra yeno pê 10ê adare de prosesê Newroze de deklarasyonêk weşanabi û 3 krîteran ser o vindertbî.
Partî û rêxistinê ke mîyanê îtîfaqî de ca gênê wina yê: Kongreya Komelê Demorkatîkî (KCD), Têgêrayîşê Cinîyan ê Azadan (TJA), Partîya Herêmanê Demokratîkan (DBP), HDP, Partîya Komunîste ya Kurdîstanî (KKP), PDK-Vakur, Partîya Azadîye, Partîya Azadîye û Merdiman (PÎA) û Komeleya Kurdan a Demokratîke ya Şorişgêre (DDKD).
Deklarasyon de wina amebi vatene:
”Îqtîdarê AKP-MHPyî Rojawan û Başûrê Kurdîstanî de polîtîkayanê îşxalî ano ca, verê çimanê dinya de çekanê kîmyewîyan xebitneno. Ma veng danê ke nê hêrişî cade bêrê qedînayene. Nê hêrişî parçebîyayîşê sîyasetê kurdan ra hêz gênê. Wa pêro partî û hêzê Kurdîstanî tewir û sîyasetanê menfaatanê xo ra fek vera bidê û bi şîarê ‘Roje roja yewîya neteweyî ya’ destkewteyanê kurdan bipawê. Birêz Ocalan 24 serrî yo Zîndanê Îmraliyî de binê tecrîd û îşkenceyî de yo ke no sûcê merdimîye yo. Wa pêro tepişteyê sîyasî û nêweşî bêrê veradayene. Ma venga hukmatî danê ke sere de Birêz Ocalan seba pêro tepişteyanê nêweşan û sîyasîyan gamêke bierzo.
Rejîmê xespî binê nameyê qeyûmî de polîtîkayanê qirkerdişî yê vera ziwan, nasname û kulturê kurdan ano ca. Kurdkîya ke ziwananê qedîman ra ya, bi destê hukmatê AKP-MHPyî yeno qedexekerdene. Perwerdeyê bi ziwanê dayîke waştişo tewr pîl ê kurdan o û xeta sûre ya kurdan a. Ma dewaya ziwanê kurdkî kenê û heta ke kurdkî biba ziwanê perwerdeyî têkoşînê xo ra fek vera nêdanê.
Şerê AKP-MHPyî yê vera kurdan welat de bîyo sebebê krîzê ekonomîkî. ‘Îqtîdar seba ke rijîyayîşê xo binimno û emrê xo derg bikero wazeno HDPyî pê dewayanê komployan biqefilno. Şarê kurdî vera hêrişan xo ver da, hêrişî pûç kerdî û do pûç bikero. Vera nê hêrişan çareserîye caardişê yewîya neteweyîye ya Kurdîstanî yo. Naye ra pey ma do têkoşînê azadîya neteweya kurdan bigêrê xo ser.”
Temsîlkaranê KCD, TJA, DBP, HDP, KKP, Partiya Azadî, PÎA, PDK/Vakurî Newroze de serê sehne de şar selam kerd. Hemsereka DBPyî Salîha Aydenîze nameyê Xebata Îtîfaqê Kurdîstanî venga şarî da ke 3 krîteranê deklarasyonî tesdîq bikero.
3 krîterî nê yê:
-Seba ke kurdkî biba ziwanê perwerdeyî ma do têkoşîn bikerê
-Seba azadîya Kurdîstanî û Tirkîyeya demokratîje ma do têkoşînê hemparî bikerê.
-Seba azadîya Rayberê şarê Kurdî Abdullah Ocalanî û pêro tepişteyan ma têkoşîn bikerê. Çime: ANF
