Hemserekê OHDyî yê Stenbolî Gurkan Îsteklîyî îfade kerd ke ganî heyetê xoserî derheqê hêrişanê kîmyewîyan de cigêrayîş bikerê.

Hemserekê Şubeyê Stenbolî yê Komela Huqûqnasan a Seba Azadîye (OHD) Gurkan Îsteklîyî derheqê babete de ANFyî rê qisey kerd.

Îsteklîyî îfade kerd ke merdimê ke wazenê dîmenê serê hêrişanê kîmyewîyan cibigêrîyê yenê hedefkerdene la herinda înan de ganî wina bêro kerdene ke heyetê xoserî herême de cigêrayîş bikerê.

Îsteklîyî vat: “Eke dewlete şuxilîyayîşê nê çekan red kena ganî seba cigêrayîşî zî veng bida. La eke merdimê ke wazenê hêrişan bêrê cigêrayene yenê hedefkerdene, o çax rewşe bena sebebê şikan. Rojnamegerî eşkenê her çî ser o xeberan bikerê, îdîayan ser o vinderê. Verî zî binê nameyê ‘operasyonanê KCKyî’ de rojnamegerî ameybî tepiştene. Bi nê hawayî rojnamegeran rê îşkence yeno kerdene ke sucê îşkenceyî de krîterê wextvîyartişî çin o.”

Îsteklîyî da zanayene ke her ke weçînayîş beno nêzdî asta faşîzmî zî zêdîyena û hîna zaf raştîyî komelî ra yenê nimitene. Îsteklîyî vat: “No zulm ver bi weçînayîşî do bizêdîyo. Vera nê zulmî û bêhuqûqîye ganî her kes vengê xo berz bikero. Êyê ke nê zulmî kenê, bêvengîya komelî ra paştî gênê. Ma sey huqûqnasan heta peynî do vera nê bêhuqûqîyan vinderê.”