Îran de 22 hezar çalakwananê serewedaritişê “Jin jiyan azadî” rê ef vejîya.
Goreyê xebera ISNA heta nika 82 hezar kesî kewtî efî vera. Înan ra 22 hezar kesî çalakwanê serewedaritişî yê ke badê kiştişê Jîna Emînî dîya destpêkerdene yê.
Goreyê zanayîşanê ke selahîyetdaran pare kerdî tepişteyanê bînan ra do nizdê 60 hezar kesî bêrê serbest veradayene û bi efê peyênî cezaya 34 hezar kesan zî ameye warodayene.
Cinîya ciwana kurde Jîna Emînî 16ê êlule de Tahran de hetê polîsanê ehleqî ra ameye qetilkerdene. Naye ser şaranê Îran û Rojhelatê Kurdistanî vera rejîmî serewedarit. Goreyê Rêxistina Heqanê Merdiman a Îranî 64ê ci domanî, 39ê ci cinîyî tewr tay 488 kesî nê serewedaritişî de ameyî qetilkerdene. Yeno texmînkerdene ke bîlançoya raşte dahîne gird a. Bi des hezaran kesî zî ameyî tepiştene.
Wextê nê serewedaritişî yo ke serkêşîya cinîyan de yeno rayraberdene de aşma teşrîna peyêne ra nata na rey mektebê wendekaranê kênayan bîyî hedefê hêrişanê bigazî. Goreyê selahîyetdaran tewr tay 13 hezar wendekarî binê tesîrê gazan de mendê.
