Rayberê Şarê Kurdî Abdullah Ocalanî embazanê xo reyde Îmrali ra dîmenêk erşawit. No dîmen bêguman têna hetê îdeolojî ra nê, bi hawayêko manewî zî girîng bî. Çike şarê kurdî 26 serrî yo Ocalanî ra çi dîmenêk nêdîbî. Dîmen ra zî aseno weşîya Ocalanî baş a û o do şarê xo rê hîna zêde rayîrê rastikênî bimojno. Fikrê ey do komelê Kurdîstan û Tirkîya rê rayberîye bikero.
Serra 2025î de ma raştê 4 gamanê şênber û avzelan ameyî. Înan ra yewin vengdayîşê 27ê Sibate bî. Rayberê Şarê Kurdî Abdullah Ocalanî seba aştîye û komelê demokratîkî veng da heme Kurdîstan, Tirkîya, Rojhelato Mîyanên û dinya. Ey ard ziwan ke hinî têkoşîno çekdar nê, polîtîkaya demokratîke sey metod bêro şuxilnayene. Na çarçewa de gama dideyine bi destê PKK’yî erzîyaye. Seba çareserkerdişê persanê seserre, PKK’yî mesuldarîya xo arde ca û Kongreya 12. ya ke 5-7ê gulane de qewimîyaye de qerarê ronayîşê çekan û fesîhkerdişî da. Na game zî bêşik gamêka tarîxî û rûmetdare bîye. Armanc pîlkerdişê hêvîya cuya hempare yê şar, bawerîye û nasnameyan bî. Gama hîreyine 9ê temmuze de yewna bi destê Abdullah Ocalanî erzîyaye. Ey reyna bale ante çareserîya demokratîke ser.
Komunalîzm
Vengdayîşê 9ê temmuze de tayê babetê balkêşî est ê. Înan ra yew komunalîzm o. Wina aseno ke Ocalan komunîzmî rexne keno û herinda ey de konseptê “komunalîzmî” şuxilneno. Seke zanîyeno rîçikê komunalîzmî heta Komunê Parîsî yê 1871î şino. Komunalîzmo modern bi destê Murray Bookchînî amebî formulekerdene. Nê pergalî de vera merkezperestîye îdareyê herêmî wayîrê cayê girîngî yê.
Dewlete û komel
Babeta bîne netewe-dewlet a. Ocalan vano ke ganî armancê şorişgeran awankerdişê netewe-dewlete nêbo. Netewe-dewlete komelî rê aramîye nê, “alozîye” ana. Nê konteksî de Ocalan nuseno ke eke sosyalîzm dewlete beno, aver nêşino. Çiqas ke dewlete pîl bena, hende komel xemgîn û belengaz beno. Coka formulasyonê Ocalanî de prensîbê “dewlete şenik bibo, komel zaf bibo” ca geno.
Tewrbîyayîşê komelî
Ocalanî vengdayîşê xo de bale ante rolê komelî ser zî. O pêşnîyaz keno ke wa her kes hetkarîye bido nê prosesî, kes nêvajo ke “ez” yan “ti”. Ganî 85 mîlyon hemwelatîyî wayîrê nê prosesî bivejîyê û seba ke no proses ser bikewo, her tewr hetkarîye bidê. Têna partîyê ke parlamento de nê, heme enstîtutê demokratîkî, rêxistinê meslekî û rêxistinê cinîyan ganî nê prosesî reyde eleqedar bibê û aştîye rê xizmet bikerê. Sewbîna têna bi xîretê PKK’yî û Abdullah Ocalanî no proses netîce nêdano.
Gama 4.
Gama 4. zî reyna bi destê PKK’yî şaristanê Silêmanî de erzîyaye. Rêxistine çekê xo bi zerrîwazî veradayî û vernîya polîtîkaya demokratîke akerde. Bi kilmî Têgêrayîşê Azadî yê Kurdan seba aştîya mende her gama şênbere eşte û mesûldarîya xo arde ca. Nika dore dewlete de ya. Na rey komel paweno ke îqtîdar bêveng nêmano û wezîfeyê xo bîyaro ca.
