Endamê Meclîsê Partîye yê DBPyî Îzzet Karadagî îfade kerd ke îqtîdarê AKP-MHPyî wazeno bi rayîrê şerî serê meseleya kurdan bigêro û wina vat: “Neçareserkerdişê meseleya kurdan de netîceyî teyna şer, bombardumanî, operasyonê teberê sînorî, kiştiş û merg ê.”

Karadagî pare kerd ke meseleya kurdan bi şer û hêrişan çareser nêbena û vat: “Tek rayîrê çareserîye zemînê demokratîkî de dîyalog û muzakerekerdiş o. Neçareserkerdişê meseleya kurdan de netîceyî teyna şer, bombardumanî, operasyonê teberê sînorî, kiştiş û merg ê. Îqtîdarê AKP-MHPyî bi ferzkerdişê şerî wazeno meseleya kurdan zemînê şerî de war verdo. No rayîr zaf reyî ame ceribnayene. Îqtîdar meseleya kurdan bi afernayîşê manîpulasyonî, bi bêvengkerdişê komelî xîret keno bimojno ke polîtîkayê asayîşî çare yê û şerî vila keno.”

Karadagî îfade kerd ke îqtîdarê AKP-MHPyî seba ke meseleya kurdan zemînê demokratîkî de nêra çareserkerdene muracatê şerî keno. Karadagî vat: ”Prosesê şerî de zî kiştiş û mergî est ê. Dima ke 12 leşkerî kişîyayî îqtîdarî ancî dest pê ‘operasyonê teberê sînorî’ kerd. Bi nê hawayî îqtîdarî vat ‘Biewnê, mi qedîna, şîya serê înan’ û weçînayîşanê herêmîyan ra ver rojdemê şarî bi neteweperestîye îşxal keno. Ma nê rayîrî sey tehlukeyînî vînenê. Ma wazenê ancî dîyalogê demokratîkî dest pêbikerê, tecrîdê vera Birêz Ocalanî biqedo û ey de pêvînayîşî bêrê kerdene. Nê çîyî rayîrê qedîyayîşê merg, kiştiş û şerî yê.”