Bi serkêşîya Serekê PKKyî serranê 1970an de vera nîjadperestan û serdestan têkoşînê azadîye dest pêkerd. Her ke no têkoşîn pîl bî, dewleta tirke zî tedaya xo zêdînaye. Seba ke kurdî serê erdê xo de ameyoxê xo dîyar nêkerê, her metodêko gemarin şuxilîya. Îşkenceyî, qetlîyamî, tepiştişî, qedexekerdişî mîyanê nê metodan de bîyî. Bêguman kurdan têkoşînê xo ra fek vera nêda û hema zî no xoverdayîş bi qerardarî dewam keno. Kurdî baş zanê ke cayo ke tede serdestîye est a, uca de ne weşhalîye bena ne zî azadîye. Kurdî do seba heqanê xo heta hela peyêne têkoşîn bikerê.
Dewleta tirke û hemkaranê ci baş zana ke Ocalan rayberê kurdan o. Coka vera ey komployêk ame serûberkerdene. Înan plan kerd ke Ocalanî bierzê zîndan û îradeyê şarê kurdî bişiknê. Na çarçewa de Ocalan teşrîna verêne 1998 de paytextê Sûrîye Şam ra vejîya. Raver şî Atîna û uca ra şî Moskova. Hukmatê Yevgenîy Prîmakovî vera Serekê PKKyî “desîse” amade kerde. Rixmo ke parlamenteranê Rûsya tesdîq kerd, destûr nêdîya Ocalanî ke Rûsya de biciwîyo. Netîce de mecbur mend û Rûsya ra şî Îtalya.
Roma ra heta Naîrobî
Ocalan 12yê teşrîna peyêna 1998î de resa paytextê Roma yê Îtalya. Tîya de nêzdî 2 mengî mend. Nê prosesî de sere de Amerîka hêzanê mîyanneteweyîyan hukmatê Îtalya rê teda kerdêne ke wa Ocalanî teber bikerê. Peynî de hukmatî xover nêda û Ocalan 17ê çeleyê 1999î de Roma ra zî vejîya. Dima ra mîyanê Moskova, Mînsk û Atîna de raywanîye kerde. Netîce de nê dewletan de ca nêdîya ci. Bado 2yê sibata 1999î de ame berdene bi paytextê Naîrobî yê Kenya.
Îstîxbaratê Yewnanistanî
2ê sibate de teyare ya ke bi destê gladyoyê NATOyî û CIAyî ameye akortkerdene, serê sibayî vejîyaye rayîr. Îstîxbaratê Yewnanistanî ra Savas Kalenderîdîsî da zanayene ke teyare do şêro Komara Afrîkaya Başûre. Ey vat ke beşdarîya bextwaştişî ya Ocalanî ameye redkerdene, ê do reyna beşdar bibê û nê semedî ra ê mecburê ke Kenya de peyebîyayîş bikerê. Birastî tîya de “kay” estbî. Teyareya Ocalanî goreyê saeta Kenya 13.33 de Naîrobî de Raşteyê Teyaran ê Jomo Kenyattayî de peye bîye. Sersefîrê Yewnanistanî yê Kenya George Kostoulasî Ocalan pêşwazî kerd û ci rê wina vat: “Ez NATO de nêzdî 20 serrî yo serê beşî yo ke to gêreno de ya. Mi asmên de gêrayêne ke ti erd de dîya.”
Dojeyê Naîrobî
Serekê PKKyî Naîrobî de 13 rojî mend. No proses hetê Ocalanî ra sey “dojeyê Naîrobîyî” ameyêne pênaskerdene. Hêzanê mîyanneteweyîyan seba Tirkîya “xelate” amade kerdêne. Nê konteksî de 4ê sibate de hukmatê tirkan rê ame vatene ke ê eşkenê Ocalanî Kenya ra bigêrê. A roje Serekwezîr Ecevîtî Serekerkanê Pêroyî Huseyîn Kivrikoglu, Musteşarê MÎTî Şenkal Atasagun û Serekkomar Suleyman Demîrelî reyde pêvînayîşêk kerd. Netîce de planê remnayîşê Ocalanî ame qebûlkerdene. Tewr zîyade Ecevîtî wina vatbî: “Amerîka çira Abdullah Ocalan teslîmê ma kerd, mi fam nêkerd.”
Ocalan ame teslîmkerdene
Yewna 4ê sibate de bi nimitkî girawa Îmraliyî ameye talkerdene. Tepişteyê girawe ameyî neqlkerdene zîndananê bînan. Seba tepiştişê Serekê PKKyî amadekarîyî virazîyayî. 15ê sibate şan de Sersefîrîya Yewnanistanî ya Kenya de Ocalanî rê tedayî ameyî kerdene. Saete 20.00î de netîceya komployî yo ke bi destê hêzanê mîyanneteweyîyan virazîya Ocalan ame teslîmkerdene dewleta tirke.
Têkoşînê azadîye
A roje ra nata Serekê PKKyî Abdullah Ocalan girawa Îmraliyî de seba azadîya şarê xo xoverdayîşê bêhempayî rayra beno. 3 serrî yo raştê tecrîdê giranî yeno. Dewleta tirke seba ke Ocalan kesî reyde têkilîye nêvirazo her metodê lêşinî gurênena. Hem huqûqê xo hem zî huqûqê mîyanneteweyî binbay kena. Wa se kena bikero, têkoşînê şarê kurdî nêeşkena asteng bikero. Êdî têkoşînê azadîye maneno “laşerî”. No laşer do pêro serdestan, dizdan û nîjadperestan çîn bikero.
