Avûkatanê Rayberê Şarê Kurdî Abdullah Ocalanî ra Îbrahîm Bîlmezî îfade kerd ke Ocalan 23 serrî yo Îmrali de bêmabên bi hawayêkê hemparî xo ver dano û wina dewam kerd: “Ganî komelo demokratîk ney bivîno û goreyê ci xo xurtêr bikero.”

Avûkatanê Rayberê Şarê Kurdî Abdullah Ocalanî ra Îbrahîm Bîlmezî tecrîdê Îmraliyî, qedexeyê pêvînayîşî û ‘heqê hêvî’ ANFyî rê ercnayî.

Bîlmezî bale ante cezayanê dîsîplînî ya vera Ocalanî ser û vat: “Nê cezayî hem seba astengkerdişê pêvînayîşan hem zî seba astengkerdişê heqê hêvî yenê dayene. Birê mehkemeya înfazî yê ke bi heman hewayî pêvînayîşê bi avûkatan asteng kenê, hetê qanûnî ra bingehêkê ci çin o. Vera krîteranê pêroyîyan ê huqûqî yo, heman wextî de vera madeya qanûnî ya Tirkîya ya. Qet meşrû nîya, birêka keyfî ya. Bîyo 18 mengî ke ma nêeşkenê muwekîlanê xo yê Îmraliyî bivînê. Mîsalê ney o bîn dinya de çin o. Merdimî hêdî hêdî netîceya tecrîdê Îmraliyî xo ser de hîs kenê. Coka ganî nêrazîbîyayîşê vera tecrîdî bizêdîyê.

Têkoşîno demokratîk key ke asta xoverdayîşê Îmraliyî de ame kerdene, hînî meseleyî çareser bibê. Abdullah Ocalan 23 serrî yo Îmrali de bêmabên bi hawayêkê hemparî xo ver dano. Ganî komelo demokratîk ney bivîno û goreyê ci xo xurtêr bikero. Mehkemeya Heqanê Merdiman a Ewropa (MHME) vana çew nêeşkeno cezaya muebede bido. Tirkîya zî seke îtîraf kena vana Abdullah Ocalan û tepişteyanê sîyasîyan ê bînan rê cezaya muebede ya girankerde dîyaya. Ma hêvîdar ê ke Tirkîya wextêkê kilmî de na şaşîye ra abigêra. MHME wazena çarçewa heqê hêvîye de cezaya tepişteyan 20 serran ra dima newe ra bêra ercnayene. Ganî seba ney vurîyayîşê qanûnî bêrê kerdene û mekanîzmayêke bêra awankerdene.”

Îbrahîm Bîlmezî vist vîrî ke Rayberê Şarê Kurdî Abdullah Ocalan tim seba aştîye xebitîya û vat: “Wexto ke îmkanêko qij zî est bo ey xîret kerd ke çareserîye bîyaro ca. Meseleya kurdan de zî seba çareserîye ey tim mesuldarîye girewte xo milî. Merdimêko winasên seba komelê Tirkîya zerar nîyo. Eqsê ci seba Tirkîya faydeyin o. Ganî Tirkîya seba heqê hêvî yê Ocalanî vurîyayîşan bikera û biranê MHME bîyara ca. Eke Tirkîya nê biran nêyara ca Konseya Ewropa vera ci ambargoyî ferz bikera.”