Tecrîdo ke bi serran o vera tepişteyanê sîyasîyan de yeno rayraberdene bi tecrîdkerdişê Rayberê PKKyî Abdullah Ocalanî reyde hîna giran bî û vilayê pêroyê zîndananê Tirkîya û Kurdistanî bî. Tepişteyanê ke 30 serrî zîndanan de emrê xo pûç kerd bi qedîyayîşê ceza serbest yenê verdayene la tayî zî bi bahaneyanê cîyayayan yê sey vêşnayîşê înfazî yenê tepiştene. Tepişteyê ke 30 serran ra dima vejîyayî zî seba azadîya embazanê xo û şikitişê tecrîdî veng danê. Înan ra yew zî Felat Amed o. Amedo ke 30 serrî zîndananê cîya cîyayan de tepişte mend derheqê babete de qisey kerd.

Amedî qiseykerdişê xo de qala muhakemekerdişê xo û yê ey wextî kerd û vat: “O wext muhakemekerdiş hetê Mehkemaya Asayîşê Dewlete ra ameyêne rayraberdene. Mehkema hetê dozger û hakîmanê leşkerîye ra îdare bîyêne. Tebîî o wext kamî ke têgêrayîşê azadîya kurd û demokrasî de ca bigirewtêne ameyêne tepiştene. Kesê ke faelîyetan de ca girewtêne nê mehkemayan de ameyêne muhakemekerdene. Mehkema bi hawayêkê sîyasî nizdîyê ma bîyêne. O wext cezaya îdamî ameyêne dayene la seba ke cezaya îdamî nêameye caardiş, 30-36 serrî ceza dîyêne. Serekatîya mehkema bi caardişê qanûnê ceza ê 59. tewr tay 30 serrî ceza dayêne ma her yewî.”

Sîyasetê tecrîdî yeno rayraberdene

Amedî bale ant vêşnayîşê înfazan ser û vat: “Nizdîbîyayîşê dewlete yê vera muxalîfan û sîyasîyan qet nêbedelîya. Netîceya çaresernêkerdişê problemê kurdî vera dewlete bi taybetî badê serra 2014î zîndanan de tecrîd giran kerd û vera îradeyê şarî de operasyonan da dest pêkerd. Dewlete wazena ke bi rayîrê şerê psîkolojîk û taybetî îradeyê tepişteyan bişikna û înan teslîm bigêra. Her çend ke cezaya tepişteyan biqedîya zî tepişteyî serbest nînê verdayene. Kesê ke cezaya ci qedîyena ganî serbest bêrî verdayene, la Tirkîya de rewşe wina nîya. Sîyasetê tecrîdî yeno rayraberdene. Huqûq de caardişêko winasî çinî yo û cezaya tepişteyan yena taloqkerdene. Bi bahaneyanê cîyayan tepişteyê kurdî hetê heyetê zîndanî ra nînê verdayene û vernîya azadîya înan yena girewtene.”

Îmrali laboratuvarê probleman o

Amedî tewr peynî qala sîstemê zîndanan û rewşa Îmraliyî kerd û wina vat: “Merkezê pêro caardişan û cayê pîlotî zîndanê Îmrali yo. Nizdîbîyayîşê vera Rayberê Kurdî nizdîbîyayîşê vera problemê kurdî nîşan dano. Dewlete çareserîyêka aştîyane, demokratîk û sîyasî nêwazena. Coka ra tecrîdê Îmraliyî rayra bena. Sîstemo bîyaye laboratuvarê ewja de virazîya û aver kewt. Bi qerarê ke eno laboratuvarî ra vejîyayî muhendîsîya şarî yeno kerdene.”

Tîya ra pê zî ma do xover bidî

Kesê ke badê 30 serrî serbest ameyî verdayîş bi xeyalanê girdan vejîyayî. La ma zî zanayêne ke do teber de her çî sey 90an nêbo. Ma girêdayeyê dewaya embazanê xo yê şehîdan, sehaya zîndanî û paradîgmaya Ocalanî yî. Ma bi no hawa ewja de xover dayêne. Wextê ke ewja de ameyî vîyartene taybet î. Goreyê dîyalektîkê xozayî bedilnayîş virazîyeno. Vera hende çîyan de reyna zî ma eşkenê vajî ke şar girêdayeyê dewaya xo yo û zîndanan ra hêvîdar o. Ma sozê azadîye û girêdayeyê Rayberîye dabî. Ma sozê xo ra nêagêrayî. Tîya ra pê zî çi bikewo milê ma ser ma do kesêk bîn rê bar nêkerî û xover bidî.”