Îdir û Patnos de bi şîarê ‘Wext wextê serkewtişî yo’ Newroze ameye fîrazkerdene û ame vatene ke kurdî do tecrîdî zî faşîzmî zî birijnê.

Îdir û Patnos de bi şîarê ‘Wext wextê serkewtişî yo’ Newroze ameye fîrazkerdene û ame vatene ke kurdî do tecrîdî zî faşîzmî zî birijnê. Şayîya Îdirî de cinî û ciwanî bi xurtî tewr bîyî. Girseyî rixmê hewayê serdî zî bi dahol û zirnayî govende girewte. Şayîye de girseyî vera sloganê ‘Bijî Serok Apo’ vat.

Şayîye de Hemşaredara Îdirî Eylem Çelîka ke herinda ci de qeyûm amebî tayînkerdene qisey kerd û sere de Aysel Tugluk, Leyla Guven, Fîgen Yuksekdag, Denîz Poyraz pêro cinîyî selam kerdî. Çelîke ard ziwan ke ê do tim sîstemê hemserekîye bipawê.

Parlementerê Partîya Demokratîke ya Şaran (HDP)yê Îdirî Habîp Eksîkî bale ante tecrîdê vera Rayberê Şarê Kurdî Abdullah Ocalanî ser û vat: ”Vera Birêz Ocalanî tecrîdêko giran esto. Wa tecrîd bêro wedaritene û ganî ma seba ney xîret bikerê. Ê do qetî pê têkoşînê kurdan nêeşkê.”

Parlementerê HDPyî yê Wanî Sezaî Temellîyî vat: ”Hişmendîya ke Helebçe de kurdî qetil kerdî ewro dewam kena. La kurdî rixmê hende qirkerdişan zî tewirê xo ra fek vera nêdanê. Reyna kurdan rê zulm û şîdetî yenê ferzkerdene. Ma do wayîrê heqanê xo vejîyê û têhet vinderê. Ma do nê faşîzmî birijnê û rejîmê qeyûman çin bikerê. Seba ke Tirkîya demokratîk biba ganî meseleya kurdan çareser biba. Çareserîya na mesele zî Îmraliyî de ya.”

Qiseykerdişê Temellîyî ra dima adirê Newroze ame tavistene û şarî dormeyê adirî de govende girewte. Koma Dengê Meymanî û Servet Kocakaya do vejîyê sehne ser.

Qezaya Patnosî ya Agirî de zî rixmê hewayê serdî warê Newroze debi. Parlementerê HDPyî yê Agirî Abdullah Koçî şayîye de qisey kerd û vat: ”Erdogan vano meseleya kurdan çin a. La deyîr, waez û kilamê kurdkî yenê qedexekerdene. ”

Qiseykerdişî ra dima adirê Newroze ame tavistene.