Ronayoxê partîya TKP-MLyî Îbrahîm Kaypakkaya serrgêra 49. ya qirkerdişê xo de ame yad kerdene.
Komîte eşkerayîya xo de wina vat: “49 serrî verî rayberê ronayox ê partîya ma hemra Îbrahîm Kaypakkaya Zîndanê Amedî de amebî qetilkerdene. Serra 50. ya şer û têkoşînê partîya xo de ma rayber Îbrahîm Kaypakkayayî reyna yad kenê. Ma soz danê ke armancê ci yê têkoşînê komunîzmî û şorişê şarî yê demokratîkî bi qerardarîya ey bikerê.”
Îbrahîm Kaypakkayayo ke serra 1949î de dewa Karakaya ya qezaya Sungurlu ya Çorumî de ame dinya wextê cîwanîya xo de tewrê têgêrayîşê şorişî bî. Ey bi hevalanê xo vera dewleta tirke xoverdayîşo çekdar kerd. Kaypakkapa 1973î de Dêrsim de bi hevalanê xo vera artêşa tirke kewt pêkewtiş û peynîye de ame tepiştene. Zîndanê Amedî de 4 aşmî îşkenceyêko girs dî û 18ê gulana 1973î de ame qetilkerdene.
