Teorîsyeno bolşevîk Vladîmîr Îlîç Lenîn fikrîyeno ke her dewlete eslê xo de şarî rê nê, sinifanê serdestan rê xizmet kena û sey “hacetê teda” yena şuxilnayene. Na çarçewa de kitabê Buharîn û Preobrajenskî yê “Alfabeya Komunîzmî” de zî nusîyeno ke kapîtalîzm de dewlete “rêxistina” sinifanê sermayedaran a. Yanî heme artêşe, polîs, unîversîteyî, yewinê îstîxbaratî, zîndanî, medya, mehkemeyî seba menfaetanê sermaye yenê sazkerdene. Coka pergalê kapîtalîzmî de “huqûqo xoser” yan azadîya hukmî çin a. Gama ke bitaybetî dewayê sîyasî abenê, muhakemekerdiş beno û birî gêrîyenê, hertim goreyê îqtîdarê sermayedaran yeno têgêrayene. Artêşe û polîs eslê xo de asayîşê hêzanê serdestan pawenê. Unîversîteyan de perwerde seba ke wendekarî şêrê burjuwazî rê xizmetkarîye bikerê dîyeno. Zîndanan de êyê ke vera îqtîdarê sermayedaran şer kenê est ê. Medya de hertim propogandayê sinifanê serdestan virazîyeno. Mehkemeyan de dozger û dadgerî “emirberîya” sinifa burjuwazî kenê.
Tirkîya de zî pergalo kapîtalîst est o. Hêzê huqûqî nê, huqûqê hêzan est o. Qanûnê dewleta tirke manenê “marî”, têna înanê ke lingerut ê gaz kenê. Rejîmê hêzan de lingerutan rê ca çin o. Ê raştê her tewr cîyakerîye, serdestîye, zordestîye û zulmî yenê. Mîyanê lingerutanê Tirkîya de elewîyî, kurdî, sosyalîstî û pêro kêmneteweyîyî est ê. Qanûnî têna vera înan yenê xebitnayene. Serdestî û êyê ke serdestanê rê xizmetkarîye kenê, nênê muhakemekerdene. Mîsal nika Tirkîya de yew dozger est o, nameyê (Akin Gurlek) ci zaf “namdar o”. Gurlek sembolê pergalê pûçbîyayeyî yo û goreyê huqûqî nê, bi emirê otokratî têgêreno. Otokrat kemane cineno, dozger û dadgerî reqs kenê. Goreyê maddeya 140. ya qanûnê bingeyî ganî dozger karê xo yê fermî ra teber çîyêkê bînî yê fermî û taybetî nêkero. La ame zelalkerdene ke dozger mîyanê şîrketa Etî Madenî de kar keno. Rixmo ke na rewşe zanîyena, vera Akin Gurlekî çi tehqîqatêk nêvirazîyeno. Hetêk ra Gurlek seba otokratî “qanûnan” ano ca, hetêkê bînî ra vera ey qanûnî nênê caardene. Tîya de ne huqûq ne edalet ne zî muhakemekerdiş est o. Têna qanûnê daristanî derbasdar o.
Dewaya Selçuk Mizrakli
Komedyaya huqûqê Tirkîya çend rojan verî Hemşaredarê Şaristanê Girdî yê Amedî yo verên Selçuk Mizrakli ser o zî zelal bîye. DEM Partî seba vengdayîşê Mizrakli beşdarîye kerde, labelê Mizrakli nêame tehlîyekerdene. Heyetê Çimdarîye û Îdare yê Zîndanî na eşkerayîye kerde: “Demê tepiştişê xo de derheqê abirîyayîşê xo yê rêxistine de beyan nêda”. Yanî heyet vano ke wa Mizrakli bêro û ma rê “roxonayoxîye” bikero. No reftarê heyetî yo gemarin armanc keno ke îradeyê merdimî bişikno. Na hişmendîye duştê Prosesê Aştîye û Komelê Demokratîkî ya. Rayapêroyîya Tirkîya û Kurdîstanî pawena ke huqûq bêro caardene û xoserîya hukmî bibo, la îqtîdar hema zî vera sîyasetmedaranê kurdan teda û zextan keno, înan zîndanan de tepişeno. No nêzdîbîyayîş ameyoxê têduşt û azadî rê xizmet nêkeno. No nêzdîbîyayîş hişmendîya merkezperest û tedakere temsîl keno.
