Hunermendê MKMyî Îsmaîl Doganî îfade kerd dewleta tirke wazena kultur û hunerê kurdan çin bikera û wina dewam kerd: “Ganî hunermendî vera nê kerdişan hîna zaf vengê xo vejê û wayîrê têkoşînî vejîyê.”
Dewleta tirke rojanê peyênan de aktîvîteyê Roşanê Ziwanê Kurdkî, konserê Aynur Dogane, Metîn-Kemal Kahramanî, kayêkê bîn ê Tîyatroyê Şaristanî yê Amedî qedexe kerd.
Hunermendanê Merkezê Kulturê Mezopotamya (MKM) ra peykerwan Îsmaîl Doganî teda, hêriş û astengkerdişê vera hunermendanê kurdan ANFyî rê ercnayî.
Doganî pare kerd ke teda, hêriş û astengkerdişê dewleta tirke newe nîyê û vat: “Ma sey hunermendanê MKMyî tim maruzê nê kerdişan manenê. Çîyêko newe no yo ke sey Aynur Dogane hînî hunermendê nerêxistinkerdeyî zî raştê nê hêrişan yenê. Ma tîya ra fam kenê ke dewlete bi hawayêkê topyekûnî hêriş kena. Mantiqê ‘Ez yew kişte de hunerê xo bikera, têkilê sîyasetî nêba ke wa dewlete zî têkilê mi nêba’ rijîyayo.”
Peykerwan Doganî dîyar kerd: “Dewlete tim bi zûran vatêne ‘Yew meseleya ma bi kurdan çin a. Têna PKK de yew meseleya ma esta.’ Nê kerdişan na zure zî pûç kerde. Dewlete pêro kurdan zî ziwanê kurdkî zî mesele kena. Dewlete çinkerdişê nînan hedef kena. Xora tesadûfî nîyo ke nê kerdişî Roşanê Ziwanê Kurdkî de bîyî. Dewlete vana ‘Ez roşanê to, to rê axû kena.’ Vera ney ma ganî têkoşînê kultur û hunerî yê rêxistinkerdeyî bikerê. Nê kerdişî polîtîkaya şerî ya. Ganî hunermendî vera nê kerdişan hîna zaf vengê xo vejê û wayîrê têkoşînî vejîyê.”
