Xebata Kovara Psyche: Mezgî serra 2020î de dest pêkerde û kovare armanc kena ke bi zazakî lîteraturê Psîkolojî û Perwerdeyê Taybetî awan bikera. Hûmara verêne ya Kovara Psyche: Mezgî hetê grubêka mamosteyan û psîkologan ra par 21ê Sibate Roja Ziwanê Dayîke ya Dinya de weşanîyabî.
Kovara Mezgî na humara xo ya dîyine de ca da Psîkolojî û Perwerdeyê Taybetî ser o babetanê neweyan û sey hûmara xo ya verêne reyna ca da nuşteyanê serê babeta otîzmî.
Hûmara dîyine de sey Astengîyanê Musayîşî û Dîsleksî hem babetanê neweyan ca girewt , hem zî otîzmî ser o cigêrayîş dewam kerd û babeta otîzmî hetê muhtewa ra hîna bi hawayêkê hîrayî ameye ercnayene. Otîzmî ser o do her hûmare de nuşteyî ca bîgêrê û dimayê çend hûmaran do nuşteyê serê na babete sey kitabî çap bibê.
Hetê bînî ra qismê psîkolojî de derheqê babeta ”Merdiman ser de tesîrê Kovîdî” de meqaleyêke îngîlîzkî ra ameye açarnayene. Reyna na hûmare de bîyografîya Montessorî de babeta verdibistane zî cayê xo girewt. Yew roportajê rindekî reyde hûmara dîyine bîye temam û amade ya ke biresa destê wendoxan ver.
