Endama Dîplomasî ya Têgêrayîşê Azadîye yê Cinîyanê Êzidîyan (TAJÊ) Sûham Şengalîye vat ke dewleta tirke Zap û Avaşîn de derbanê giranan wena û pare kerd: “Hukmatê Kazimîyî zî do nêeşko armancê xo bîyaro ca.”
Sûham Şengalîye ANFyî rê qisey kerd ke hêzê Kazimîyî 18ê nîsane ra nata hêrişê Şingalî kenê û vat: “Şerî 18ê nîsane de Dugir de dest pêkerd. Dima hêriş vilayê Tilizêrî bî. Vizêrî ra nata bi konvoyanê pîlan hêzî ameyî ke hêrişê Şingalî bikerê. Asayîşê Êzidxanî, YBŞ û şar rayîr nêdanê ney. Seba ke mesele bi dîyalogan çareser biba ma xîret kerd la Iraqî şer tercîh kerd. Waştişê Îdareyê Xoserî nêameyî qebulkerdene. Nê pêro nîşaneyê şerî bîyî.”
Sûhame ard ziwan ke hêrişê vera Şingalî, Rojawan û Herêmanê Pawitişî yê Medya pabesteyê yewbînan ê û pare kerd: “Dêsê mabênê Rojawan û Şingalî virazîya û eleqeyê nê hêrişan bi Peymana 9ê Teşrîna Verêne est a. Şarê Şingal û Rojawanî vera DAÎŞî şer kerd. Zapî ra heta Şingal û Rojawanî bi hemwextî hêrişî yenê kerdene. Pêvînayîşê Barzanîyî û Erdoganî de planê nê hêrişan ameyo kerdene. Dewleta tirke û PDK hêrişê gerîlayan kenê, Kazimî hêrişê Şingalî keno. Herinda ke êzidîyan rê hûrmet bêro kerdene hêrişê ci yeno kerdene. Hêzê ke nê hêrişan kenê 2014 de nêeşkayî hêrişê vera Şingalî bikerê.”
Sûham Şengalîye qiseykerdişê xo wina dewam kerd: “Ma do vera hêrişan xo bipawê. TAJÊ û cinîyan ê êzidîyan hişyarîye daye hukmatî ke wa hêzanê xo apey bianjo. Êzidîyan qerardarîya xo eşkera kerde. Tewirê cinîyan ê êzidîyan zelal o. Seba xoserîya Şingalî û pawitişê erdê xo, ma do heta peynî xo ver bidê. Ma do erdê xo bipawê û xoserîya xo mende bikerê. No heqê ma yo meşrû yo. Serkewtişê Zap û Avaşînî serkewtişê Şingalî yo. Dewleta tirke Zap û Avaşîn de derbanê giranan wena, hukmatê Kazimîyî zî do nêeşko armancê xo bîyaro ca.”
