Rejîmê seraye hukmî sey hacet şuxilneno. Mehkemeyî tîtikê olîgarşî bîyî. Serê Mehkemeya Qanûnê Bingeyî de teda est a. Hukmê seraye qetilkarê Hrant Dînkî verada
Welatêk de eke yew merdim her hêzî gêno binê bandora xo, uca de aramîye û weşhalîye xeyal ê. Nameyê na pergale “otokrasî” yo. Otokrasî de têna menfaetê “otokratî” xebitîyenê. Yanî otokrat wazeno ke her dezgeh û sazgeh goreyê waştişê ey bixebitîyê. Bitaybetî hukm û dezgehê hukmî rolêkê girdî kay kenê. Seba otokratî armanco yewin îşxalkerdişê wareyê hukmî yo.
Erdogan zî wazeno pergala monolîtîke de “monomîtêk” bibo. Seba ke bibo “dîk”, welatî açerneno “çopgeh”. Nika zî dormeyê hukmî de yeno û şino. Xora hukmê dewleta tirkan nêweş û problemin o. Qanûno bingeyî derbekaran ra mêras mendo. Rejîmê Erdoganî o hukmo xirab teslîm girewt û hîna xirab kerd. Şar nika Kenan Evrenî rê şukr keno.
Komara dizd û heramîyan
Mîyanê 20 serran de xeylêk qanûnî yan vejîyayî yan zî bedilîyayî. Peynî de merdim vîneno ke bêedaletîye û neheqî zêdîyayî. Edalet esteyê demokrasî yo. Eke nebo, uca de qetî merdim nêeşkeno qalê demokrasî bikero. Komara Tirkîya de xora destpêk ra heta nika qet edalet çînbî. Nê semedî ra demokrasî zî çînbî. Destpêk ra heta roja ewroyêne cergan pêro dezgehê dewlete girewtî binê serdestîya xo. Bi no hawa dewlete înan rê xizmet kerd û hema zî kena. Komara Tirkîya komara dizd, xapxapok û heramîyan a. Çekuya “komare” zûrêka gird a. Cergan her tim pergala xo ya gemarine pê çekuya “komare” nimite. Ewro zî cergê Erdoganî na polîtîka rê dewam kenê.
Dozger û hakîmî ‘berban’ ê
Çend serrîyo wezîr û merdimê Erdoganî bêrayirîye û bêusulîye kenê. Labelê hukm têna temaşe keno. Dozgerî û hakîmî tersenê. Bitaybetî serra 2017î ra nata dozger û hakîmî sey “berbanê” Erdoganî xebitîyenê. Ê têna menfaetanê seraye pawenê. Çike Heyetê Dozger û Hakîman (HSK) kewt destê îqtîdarê AKP-MHPyî. Nika 13 endamê nê heyetî est ê. Pêro endamî birastî bi destê nê îqtîdarê lêşinî yenê tayînkerdene. Coka merdim Tirkîya de vera cergan û dizdan dewayêka rastikêne nêvîneno. Cergî bi hetkarîya dozger û hakîman bi hawayêkê keyfî butçeya şarî diznenê.
Zamayê Ethem Sancakî
Çend rojî verî wareyê hukmî de krîzêko bîn qewimîya. Birastî krîz nêbî, eksê ci derbe qewimîyaye. Mehkemeya Berze ya Temyîzî qerarê Mehkemeya Qanûnê Bingeyî (AYM) qestî nêard ca. Zanîyeno ke AYMyî derheqê Can Atalayî de bira binpaykerdişê heqe daye. Ganî yo ke verî Mehkemeya Cezaya Girane ya 13. ya Stenbolî na bire biardêne ca. Labelê aye nêkerd û dewa sewqê Mehkemeya Berze ya Temyîzî kerde. Dima ra Mehkemeya Berze ya Temyîzî zî bira AYMyî nêşinasnaye. Bikilmî mehkemeyanê ke binê fermanê Erdoganî de yê, hemverê AYMyî dafikêke serûber kerde. Xora serekê Mehkemeya Berze ya Temyîzî Mehmet Akarca yo. Akarca heman wext de zamayê Ethem Sancakî yo. Sancak zî nêzdîyê îqtîdarî de yo û merdimo qilêrin o. Sancak mîyanê “olîgarkanê” Erdoganî de yo. Ey vatbî ke Erdoganî rê “zerrîya” ci est a. Yanî Mehkemeya Berze ya Temyîzî fermanê olîgarşî ard ca.
Samast pawîyeno
Hukmê olîgarkan yew zî dewaya Hrant Dînkî de rolê xo kay kerd. Qetilkarê Dînkî Ogun Samast ame veradayene. Xora qetilkerdişê Dînkî destpêk de bi destê olîgarşî amebî serûberkerdene. Tewr zîyade pawitoxanê olîgarşî yanî polîsanê tirkan cînayetî ra dima Samast vet verê kamerayan û goyna. Dewleta olîgarkan qetilkar amade kerd û seba cînayetî teşwîq kerd. Nika zî ey pawena. Hende sîyasetmedarê kurdan bîlasebeb zîndan de manenê. Labelê qetilkar û cergê rejîmê Erdoganî vera dîyenê. Hukm xizmetkarê despotî yo. Despot ferman dano mehkemeyî qerar danê.
