TC muzakerayan ra çiqas erey bimano do hintayê zirar bikero. Yanê, TC do zey laşo ke, meydana dewêke de tîncî vero vinderte bo û boy dano, do boy bido. Mezgefezayî (Homa) bikero, ez şaş bî, aştî û aramî ra, TC berê xo heta peynî akero…
Tarîxa TC’yî de tenê verbê kurdan nê, verbê dewletanê xerîban, semedê taxtê îqtîdarî û zwb. bi dek û dolaban û bi xapeynayîş û îxanetan pir o. No îxanet hinî gird o ke, zereyê qesranê (sarayî) osmanîyan de birayan, birayanê xo yê pitik yê dergûşî de yo zî, qetil kerdo yo. De şima hesap bikerê ke kurdan ver de, çiqas îxanet û qirkerdiş û faîlê mechûlî kerdêy ke textê xo vinî nêkerê û hewna zî dek û dolabê înan doşa kurdan ser de yê.
Proseso ke Serek Apoyî da verî û na gamî dayo destêkerdişî ra, heta ney gamî, rojeke zî mi bawer nêkerd. Çimkî PKK’yî her ray gamê weş û geşî eştî la TC’yî gamê şênberî nêeştî. Hewna zî ez bawer nêkenî. Çimkî jest û mîmikê TCyijan, vatişê înan, têgeyrayîşê înan de heta na gamî, jey prosesanê verînan, averşîyayîşêk zî çîn o. Kişta bîne de PKK’yî gamê şênberî zaf rayî eştî û girweyê xo zey na gamî bi temamî arde ca…
TC muzakerayan ra çiqas erey bimano do hintayê zirar bikero. Yanê, TC do zey laşo ke, meydana dewêke de tîncî vero vinderte bo û boy dano, do boy bido. Mezgefezayî (Homa) bikero, ez şaş bî, aştî û aramî ra, TC berê xo heta peynî akero…
Birêz Seyîd Rizayî wina vatbî: “Mi bi hîlêyê şima baş nêkerd mi ra bi derd, mi zî, şima ver de çong nêda erdî, wa no zî, şima rê bibo derd…”
Ez fikiryayîşê xo de, hertim vatişanê vernîyanê xo, semedo ke mezgê mi jey mûmeke roşnî bikero ra, zaf bi qîmet vînenî û rayîra xo bi tecrûbeyê înan xêz kenî.
Yanê ez vanî ke, eke wina bi hîlê û dolaban polîtîkayî bêrê viraştiş, do çend rojanê ma ver de, TC heta qirika xo do bikûro çala sila xo û verbê helisyayîşî de, bikûro hewneke zey merdişî.
Eke TC aştî wazeno, lazimo intê (înat) xo ra bêro war. Eke nêyro war, zey Serek Apo vat, “Alternatîfê kurdan est ê û nêqedîyenê…” Çimkî kurdî kurdê verî nîyê. Semedo adiro ke est o têfînê ra, her ferdê kurd yê dinyayî de boy genêy, goreya xo, bi satilan awk onceno, adiro ke zalîmîy wazenêy gur bikerêy, têfînêy.
Şerê Dinya yo 3. berî verde yo!
Zalimîy semedê Asyayî têmîyan bikerêy ra bi heme qiwetanê xo yê aborî, sîyasî, sosyolojîk û psîkolojîk, şereke serd ya bi des seran verî romnaynêy. Ewnîyay ke no qîm nêkeno, çend serranê peynîyan de, şereke germine ra hadreyeyî kerdîy. Serek Apo no plan rewna hîs kerdbî ke, kurdîy zirara herî tayn bivînêra gamê aştî eştî. Kişta bînî ra zî, waşt ke şarê TC’yî cuyene ra zî zirar nêvînê û meclîsa TC’yî ra birateya kurdan tesdîq bikerê ke pîya bişêkyê rayîr bigerêy…
Rayberanê tirkan rojeva germine hewna weş fam nêkerdê, nêzanêy ke do çiçî bêro serê Anatolîya û Asya… Kurdîy bi des serrano ke şerêkê germin û sosyolojîkî mîyan de yê, tayn zaf mûsayeyê şerî yê. La şarê TC’yî çiqas hadre yê?
Wa TBMM girweyê xo bîyaro ca
Heta ke problema tirkan ya ewnîyayîşê kurdan hal nêbo û TBMM de bi qanûn ca nêgero ke kurdîy welatijêy eslî yê cayê xo yê, no mîr do hewna zaf awk bionco.
Serek Apo û giroteyê azadîye azad nêbêy, qanûnê TBMM’yî nêbedîlyo, edaleta goreya kurdan pêk nîyero, semedê ziwan û averberdişê zanisteyî dibistan û zanîngehan de qanûna Japonya meyro erêkerdiş, halê kurdan û tirkan do wina dewam bikero…
Rojawan xeta sûr a
Lazimo ke bi lez û bez TC Rojawan ra bivejyo. Çeteyanê xo oca ra bionco û înan bi temamî pasîf verado. Rojawan û Başûrê Kurdîstanî bin banêkî de meclîsêke awan bikerêy. Çimkî amayîşêkê kilmekî de qewimyayîşêy zaf girdîy do bibêy eyseno. Sifte semedo ke ma kurdîy û şarê mazlûmî yê Asya û Anatolîya zirara herî tayn bivînêy ra, na gamî ra xebatîy gerê bi lez û bez bivirazyê.
Nê semedî ra, lazimo Rojawan bibo xeta sûr ya kurd û şaranê mazlûman. Wa heme kes bizanêy xelisyayîş do Rojawan ra dest pê bikero, Başûr de bi encam bibo, Bakur de do Kurdîstanêke bi qanûn awan bibo, Rojhilat û kurdê belûcî, peştî, azerî, ermenî û yên bînan bigo boxçeya kurdan mîyan û dewletêka konfederal ya kurdan awan bibo ra têgeyrayîşî ferz êy.
