Li gorî peymanê, ku bi danûstandinên nerasterast li Misrê pêk hat, Hamas dê 20 dîlgirtiyên Îsraîlî berde; di berdêla wê de Îsraîl jî dê nêzîkî 2 hezar girtiyên Filistînî berde. Artêşa Îsraîlê dê di heman demê de ji hin deverên Xezeyê vekişe û alîkariya mirovî dê were zêdekirin.
Hikûmeta Îsraîlê, çarçoveya ku armanc dike hemû dîlgirtiyan berde, erê kir; lê belê Wezîrê rastgir Itamar Ben Gvir li dijî peymanê derket.
Ev gav wekî qonaxa yekem a plana aştiyê ya Xezeyê ya 20 xalî tê hesibandin ku ji aliyê Serokê Dewletên Yekbûyî yên Amerîkayê Donald Trump ve di 29ê îlonê de hate ragihandin. Donald Trump, behsa xwezaya aştiyane ya planê kir û got, “Kes dê bi zorê ji Xezeyê neyê derxistin.”
Li gorî artêşa Îsraîlê, ji 251 kesên ku di 7ê cotmeha 2023yan de hatine revandin, 47 kes li Xezeyê mane û tê texmînkirin ku herî kêm 25 kes mirine. Di encama şer de bi deh hezaran filistînî jiyana xwe ji dest dane û Xeze di krîzek mirovî ya giran de ye.
Plana ku ji aliyê DYAyê û Qeterê ve hatiye amadekirin, agirbest, pevguhertina dîlgirtiyan û alîkariya mirovî dihewîne. Donald Trump, diyar kir ku ew hêvî dike ku dîlgirtî roja duşemê vegerin malên xwe û got ku DYAyê wê di pêvajoya aştiyê de roleke çalak bilîze. Her wiha tê payîn ku ew roja Yekşemê biçe Orşelîmê.
