EM ji bîr nakin wan sêdaran
EM ji bîr nakin wan xwînxwaran
Hezar sal jî li ser bibore
EM ji bîr nakin wan neyaran
EM ji bîr nakin Şêx Seîdan
WAN paqrewan û WAN şehîdan
EW tim tîrêjên roja ME ne
Bi WAN serfiraz e KURDISTAN
Di dîroka mirovahiyê de, hemû kes û derdorên ku li dijî zilm, zordarî û hovîtiyan, ji bo parastina hemû nirxên XWE yên hebûnî û XWEbûnî bêtirs û xof, bi awayekî wêrek, lehengane û canbexşane têkoşiyane, ji ber gelek sedeman bi ser nekevin û di encamê de ji aliyê fîzîkî ve bi kîjan awayî bên qirkirin jî, giyanê wan tu car namire û ew nayên jibîrkirin; ew bi awayekî giyanşad û serfiraz di bext û bîr û hiş û dilê civak û mirovahiyê de cihê xwe digirin. Hinek ji wan kesan ji civak û mirovahiyê re rasterast dibin bext, bîr, hiş û dil bi xwe; ji siberoja civakê re wek çavkanî û mîrateyeke bingehîn a têkoşînê dimînin; ji bo têkoşîna azadiya civak û mirovahiyê dibin hêz û çavkaniya heqîqet, hikmet, keramet, manewiyat, rêwişt, vejen, ronahî, bawerî, hêvî û rênaşînderiyê.
Hikmet û heqîqeta bingehîn a serhildana Şêx Seîd ku sed sal beriya niha pêk hatibû jî ev e. Ev rastî, li dijî hovîtiyên pergaleke hov a ku hewl dida ku neteweya kurd bibişîvîne, bihelîne, qir bike û hemû nirxên wê ji holê rake têkoşîna XWEparastin, hebûnparastin û XWEBÛNparastinê ye; têkoşîna parastina nirxên herî bingehîn, xwemalî û jêneger ên neteweya kurd e, têkoşîna hebûn û tunebûn, man û nemana neteweyî, civakî û dîrokî ye.
‘KURDhildan’ / ‘MIROVAHÎhildan’
Li ser bingeha vê rastiyê; serhildana Şêx Seîdê nemir “ji serhildanekê gelek wêdetir e”, li dijî kurdkujî û mirovahîkujiyê ‘KURDHILDAN’ û MIROVAHÎHILDAN’ek e…
Herwiha, darvekirina Şêx Seîd û hevalên wî parçeyek ji kurdkujiyê ye; parçeyek ji mirovahîkujiyê ye, parçeyek ji hewldanên jiholêrakirina KURD, KURDÎ, KURDISTAN û hemû nirxên kurdbûn û mirovbûna XWE-bûnparêz, azad û serfiraz e. Ji ber vê rastiyê ye ku, di nava xwe de çiqas êş û kul û dilsotîneriyên kûr û hûr bihewîne jî, giyanê serhildana Şêx Seîdan, nav û nişan, bîr û mîrateyeke têkoşîna azadiya neteweya kurd û mirovahiyê ya XWEBÛNî û gerdûnî ye û dê her wisa bimîne.
Ev serhildan di gehwera xwe de, daxwazên rizgarî û azadiya kurd, Kurdistan û hemû nirxên bingehîn ên neteweya kurd dihewîne. Giyan û armanca bingehîn a vê serhildanê, parastina xet, bext, xîret, rûmet û nirxên neteweya kurd û mirovahiyê yên herî XWE-zayî, hebûnî, XWE-bûnî, gerdûnî, dîrokî, civakî û jiyanî ne. Ev yek di hemû merheleyên serhildanê de xwe bi awayekî herî zelal dide der. Kêmasî, nebesî û xeletiyên ku di hemû merheleyên serhildanê de rû dane bi tu awayî vê rastiyê qasî misqalekê ji holê ranake; ku di hemû têkoşînên neteweyî û civakî de kêm zêde kêmasî, nebesî û xeletiyên cur bi cur rû dane û ev yek tiştekî ‘xwezayî’ ye.
Herwiha rastiyeke dîrokî ye ku gelek têkoşîn û serhildanên neteweyî û civakî yên herî mafdar û rewa, ji ber gelek şert û merc û sedemên derveyî xwe û navxweyî -sed heyf û mixabin- bi ser neketine û bi awayekî hovane û dilsotîner hatine tepisandin, serhildêr û civaka wan rastî tevkujiyên herî hovane hatine. Ya girîng ew e ku, tevgerên serhildan û têkoşînên ku piştî wan pêk tên bi rengekî herî rast û zanistî, bi awayekî herî wêrek; li gel xwedîlêderketina mîrateya wan, kêmasî, nebesî û xeletiyên ku di wan serhildan û têkoşînan de de rû dane bibînin, binirxînin, bidahûrînin û encamên herî rast jê derxînin û li gor wê rastiyê tevbigerin; da ku ew jî ligel ewqas lehengî û berdêlên bêhempa bi heman rengî neyên tepisandin û rastî heman tevkujî û hovîtiyan neyên.
‘TOLhildan’a dîrokî
Bêguman, bibîranîn û xwedîlêderketina herî rast û dilsoz a bîr, hiş, giyan, şiyan, viyan, armanc û mîrateya dîrokî ya Şêx Seîdê nemir, hevalên wî û bi hezaran cangoriyên kurd ên azadiyê û mirovahiyê, bi bîr, bawerî, vîndarî, biryardarî, wêrekî û xwebexşiyeke sînornenas û şoreşger, di her şert û mercan de, li her qadê û ji her milî ve bi rengekî herî rast, şênber, domdar û encamgir bilindkirin, berfirehkirin û biserxistina têkoşîna parastina nirxên dîrokî, civakî, XAKî, MAKî, neteweyî, nasnameyî, zimanî, çandî, exlaqî, polîtîk ên hebûnparêz, XWEBÛNsaz û azadîrês ên kurdbûn û mirovbûna azad e. Ev yek jî, bi avakirina Kurdistaneke azad û demokratik a ji her milî ve pêkan e, ku ne hêzên dagirker ên biyanî tê de serdest, zordar, desthilatdar, mêtinger û hov bin, ne jî ‘hêzên kurd’ ên mêtinger, koledar, kedxwar, zordar, serdest, olîgarşîk, monarşîk, otokratîk, xweperest û XWEkuj…
Kurdistaneke azad û demokratîk jî, ancax dikare bi komên gel ên ku giyanê civakî, XWEbûnî û gerdûnî yê Şêx Seîdan û bi deh hezaran egîd û şehîdan, di her şane, henase, gav û xwehilavêtina dilê XWE de hîs dikin û dijîn û bi ramanpergela neteweya demokratîk a XWEbûnsaz, civakparêz, azadîrês û mirovahîperwer bê avakirin. Divê neteweya kurd XWE wek komên XWEbûnsaz, civakparêz, azadîrês, demokrasîhon û mirovahîperwer li her şane, gav û bihosteke axa Kurdistanê û cîhanê, ji her milî ve bi rêxistin bike, vehone; teşiya XWE birêse, tevnê XWE raçîne, tora XWE saz bike, destarê XWE bigerîne, pergal û mekanîzmayên yekîtiya xwe ya neteweyî û navneteweyî ya XWEbûnî, GERdûnî, civakî, azad û demokratîk ava bike, ji her alî ve û li her qadê ban û sîwanên hemû hêzên xwe yên yekbûyî ava bike, KURD û Kurdistanê ji her milî ve ji destê ‘dagirker, metinger, zordar û koledarên biyanî û xwecihî’ rizgar û azad bike.
Em wek neviyên Şêx Seîdê nemir, gotina wî ya “Bêguman, neviyên min dê TOLa min hilînin’ ku di sêdarê de, bi lehengiyeke dîrokî, ji ‘celad’an re gotibû û bi awirên xwe yên bêtirs wek KURDegurzekê dîrokî li serê wan daweşandibû tenê dikarin wisa pêk bînin û heqê wî û bi hezaran cangoriyan wisa li XWE helal bikin.
Ne sed sal, ne sed car
Belê; EM kurdên XWEparêz, bi dehan sal in bi awayekî bênavber û bêhempa, têkoşîna ‘TOLhildan’a nemir Şêx Seîdan û bi hezaran cangoriyên Kurdistan û mirovahiya azad didin û çi bibe bila bibe EM ê wê têkoşînê bi giyanê raz û gehwer û hikmet û keramet û heqîqeta XAK û MAKa XWE, bi serketin û serfiraziyê tacîdar bikin û SERê wan ên ku li sêdarên herî hov, li ber ‘celadên herî hov’ XWE netewendibûn rakin esmanê azadî û mirovahiyê; bi vî awayî rêzdariya xwe ya ji bo wan teqez û tekûz bikin…
Û EM ê careke din bi HEV re, li hemû cîhanê bidin zanîn ku; EW nemirin, EW namirin, EW her û her nemir in; EW jiyan, EW dijîn, EW ê her û her bijîn. EM ê careke din bi HEV re bidin zanîn ku, ME EW ji bîr nekirin, EM WAN ji bîr nakin û EM ê tu caran WAN ji bîr nekin; EW bi ME re jiyan û ME EW dan jiyîn, EW bi ME re dijîn û EM ê WAN didin jiyîn, EW ê her û her bi ME re bijîn û EM ê her û her WAN bidin jiyîn. Ne ku sed sal, bi milyonan sed hezar sal biborin jî…
Belê EW EM in, EM EW in, EW û EM HEV û XWE ne. Ma kê kariye û kî dikare ‘HEV’ên ku ‘XWE’ ne û ‘XWE’yên ku ‘HEV’ in tune bike!?…
Ey ŞÊX SEÎD û hemû cangoriyên nemir ên KURDISTAN û MIROVAHIyê! EM neviyên we bi WE SERbilind û GIYANfiraz in, ji esmanê heftan bilindtir û firaztir; ne sed caran, bi milyonan sed hezar caran…
Bi rêzdarî û minetdariyeke bêdawî; ne sed caran, bi milyonan sed hezar caran…
