Maya Lêlê herêma Serhedî ra ciwîyena, wendiş û nuştişê Maya Lêlê çinî yo. La hetê sîyasetî ra zaf xurt a. Her roj telewîzyonê kurdî temaşe kena û rojname gêna. Lajê ya derê wanenê û heyana pelê peynî goştarena. Her çiqas wendiş û nuştiş çinê bo zî, hewayê profesorî zanayîşê aye est o. Çîyer laj û çîyer kêneyê Maya Lêlê estî. La Maya Lêlê mêrdeyê xo reyde pênêkena û wazena ke mêrdeyê xo verado û cîya bo. La mêrde nêwazeno ke Lêlê ra cîya bo. La Lêlê heme hewayî zaf xurt a, eynî des camêrdan ciba xora vejena. Lêlê seba ke mêrdeyê xo de pênêkena û mêrdeyê ya zî tengayî virazeno û gedanê xo û Lêlê tehdît keno. Lêlê nê warî de sîyaset kena dewre la ancî zî yew netîce nêgêna. Lêlê eyalanê xo gêna û mêrdeyê xo ca verdana, şîyena şaristanê tirkan. Ancî zî mêrde Lêlê ra, gedeyan ra fek veranêdano û her wext nerehet keno. Lêlê û gedeyî wazenê ke mêrdeyê Lêlê bikşê. Keyeyê Lêlê pêyro yew benê, vanê “ma senî pîyê xo bikşê. Nê minaqeşe de bi Homayî ra mêrdeyê Lêlê dewa xo de yew minaqaşe de hetê mêrdimanê xora yeno kiştiş”. Lêlê û gedeyê ya zî yew nefes gênê, vanê “Homayî ra pîyê ma hetê sewbîna mêrdiman ra ame kiştiş, ma zî xelisîyayi”. Lêlê seba ke mêrdeyê xo ameyo kiştiş dewa kena gûnya mêrdeyê xo gêna û pêameyîş virazenê. Maya Lêlê welatperwer a û gedeyê aye zî welatperwer î. Lêlê û gedeyê aye Têgêrayîşê Azadî yê Kurdan reyde têkilîye virazenê. Û embazê welatperwerî ray û ray yenê şanê keyeyê Lêlê. Kurdistan de şer gêran û her roj xortê kurdan beşdarê refê gerîlayan benê. Kênaya Lêlê wazena ke a zî beşdarê refê gerîlayan bibo û beşdarê ci bena. Yew wext ra dime kênaya bîne zî beşdarê refê gerîlayan bena. La Maya Lêlê nê warî de qet zerrîya xo tenge nêkena. Ray- ray polês û leşkerî fînenê keyeyê Lêlê, vanê “kêneya to kora ya?”, a zî vana gedeyê mi ha koyan de yê, eke şima eşkenê şorê înan bigîrê. Yew roj lajê Lêlê Misto tepişîyeno û ey dekenê hepisxane. Lêlê her hewte rayîrê hepisxanî kena mesken. Wextê pêveynayîşî de embazanê Mistoyî reyde teraqê sîyasetî ke qet yewer nêeşkeno ke vera Lêlê baş bikero.
Yew wextî ra dime Misto taxlîye beno û hepisxane ra vejîyeno yeno keye. No esna de dewleta tirke Mistoyî ra sulusê leşkerî erşawenê. Maya Lêlê, lajê xora vana “Mistoyê mi ti şo şûbeyê leşkerî û sulusê xo bigî û heqê rayîrê xo zî bigî. Ti îlahî wazenê bikewê refê gerîlayan, şo rayîrê to akerde bo. Û Misto şîyenê leşkerîya kurdan keno nê warî de vano “sereyê mi zî tîk o, her wext ez wesf û wayanê to dana û şima rewşa hurmetî ra ana vîre”. Misto sey xort yan camêrd beşdarê refê gerîlayan beno û xebere erşaweno Maya Lêlê ra, vano “ez sax û selîm cayê xo resayo”. Maya Lêlê her roje TV temaşe kena û wendişê rojnameyi goştarena. La rewşa avereyî de Maya Lêlê çi pawena, çi yeno sereyê aye dîyar nîyo. Lêlê her wext gêrayîşê kênanê xo û lajê xo kena, qet nêeşkena înan ra yew xebere bigîro. O wext şer zaf giran o û teknolojî hewayê ewroyêne nîyo. Yew wexti ra dime xebera kênaya aye ya verêne yena û şehît bîya. Çend serran ra pey xebera kêna aye ya bîne yena, a zî şehît kewta. No esna de berê keyeyê Lêlê verî de lajê aye yo 16 serre binê kamyonî de maneno û dinyaya xo bedilneno. Teselîya Maya Lêlê lajê aye yo Mistoyî manena. Vana sax o û sax nîyo. Wexto ke TV temaşe kena, şaristanê Roma yê Îtalya de yew çalakî de yew xortî veynena, vana “ino Mistoyê min o”. Kêfê aye yeno û xo teselî kena. Hîne wext vêreno, Mistoyî ra yew xebere nêvejîyena . Badî yew cayî ra xebere gêna, Misto zî kewto kerwanê şehîdan. Zerrîya Maya Lêlê zaf pêt a, kêwanê qay qesba asnênina. La Maya Lêlê vana ke yew gorê gedeyanê aye bibo. Lêlê kewena rayîran. Zerrîya Maya Lêlê de hîrê estareyî asmên ra kewenê. Kêvatê qay zerrîya Lêlê asnênin ra ya. Her roj hewnê Lêlê, verdişê û veyşaneyîya aye senî vîyartê nêzanê. Maya Lêlê waşt ke yew gorê gedeyanê aye bibo û kewena rayîran, şana bajarê Kurdîstanî Amed û sazîyan ra ardim wazena ke mezela gedeyanê xo biveyno û bîyaro herêma Serhedî. La şer zaf giran o, neeşkena ninga xo fîno yew ca. Hînê teselîya aye kewena. Lêlê vana “ez ameya bajarê Amedî û ez sazîyan zîyaret bikera”. Şana rojnameyê kurdî, cenî û kênekî hetê aye ra kom benê. Cenî rewşa henekî ra Lêlê ra vanê “ino germê amnanî ra inî çi kincî to pira girotî?” Lêlê cewabê înan dana, vana “wele be şima ro, şima kincê sosyetikî pirayê girotî û xo rût kerdo. Şima çi bêj rojnamegerê kurdî yê. Maya Lêlê kincê gelêrî û kurdî piray girotî, fesa kofîya a û mexmela xora xo xemilnabe hewayê canika canikan. Lêlê hînê bajarê tirkan ra bare kena şîyena herêma xo Serhedî û emrê aye ke mendo wazena dewa xo de biciwîyo û gama ke gedeyê aye yenê vîrê ci, boya koyanê Serhedî ra gedeyanê xo û embazanê înan yad bikero.
