Bi pêşengiya Hêzên Parastina Civakî (HPC) bi hezaran kes li Çarxerêya Arîn Mîrkan a li taxa Mişêrfê ya bajarê Hesekê kom bûn û heta sûka navendî meşiyan.

Beşdaran alên HPC, YPG/YPJ`ê û pankertên “Na ji tundiya li dijî jinan re” , “Jin, Jiyan, Azadî” û wêneyên Rêberê PKK’ê Abdullah Ocalan rakirin. Girseyê dirûşmeyên “Bê Serok jiyan nabe” , “Bijî berxwedana Rojava” û “Bijî berxwedana Rêbertî” , “Na ji dagirkeriyê re” û “Na ji tundiyê re” berz kirin.

Li sûka navendî, piştî rêzgirtinê, Endama Rêveberiya Hêzên Parastina Civakî Asya Cûma axavî û got: “Bi saya fikr û felsefeya Rêber Abdullah Ocalan û rêya ku nîşanî jinan daye, jinan xwe di hemû qadên jiyanê de bi rêve bir û xwe îsbat kir.”

Cûma, anî ziman ku divê hemû jin heta bidawîkirina dagirkeriyê û pêkanîna azadiya fîzîkî ya Rêberê Gelê Kurd Abdullah Ocalan li ber xwe bidin û xwedî li xeta ku Abdullah Ocalan nîşan daye derkevin.

Çalakî bi dirûşmeyên mîna “Bijî Berxwedana Rêbertî” û “Bijî berxwedana gelan” bi dawî bû.