Di çarçoveya lêpirsîna ji aliyê Serdozgeriya Komarê ya Amedê de, di 23’ê kanûna 2022’yan de li dijî Partiya Herêmên Demokratîk (DBP) hatibû destpêkirin, Hevserokê Giştî yê DBP’ê Keskîn Bayindir û 14 hevserokên bajaran hatibûn binçavkirin. 5’emîn Dadgeha Cezayê Sulhê ya Amedê der barê Bayindir û Hevserokê DBP’a Amedê Hayrettîn Altun de bi îdiaya “endamtiya rêxistinê” biryara girtinê dabû û yên din hatibûn berdan. Danişîna pêşîn a doza Hayretîn Altûn li 5’emîn Dadgeha Cezayê Giran a Amedê hat dîtin. Altûn û parêzerên xwe Bûrhan Arta, Cemîlle Turhali, Yakûp Demîr di danişînê de amade bûn. Hevseroka Giştî ya DBP’ê Salîha Aydenîz, rêvebirên DBP’ê û HDP’ê û nûnerên rêxistinên sivîl doz şopandin.

Her tiştê me qanûnî bû

Altûn di danişînê de li dijî îdiayên li ser xwe parastina xwe bi kurdî kir û destnîşan kir ku çi çalakiyên ew jê tê tewanbarkirin hemû çalakiyên qanûnî bûne û çalakiyan di çarçoveya azadiya raman û derbirînê de li dar xistine.

Altûn xwest ku were berdan û biryara beraeta wî bê dayîn.

Heyeta dadgehê bi şertê kontrola edlî û qedexekirina derketina derveyî welat biryara berdana Altûn da û danişîn taloqî 9’ê adarê kir.