Seba ke Rayberê Şarê Kurdî Abdullah Ocalanî 27ê sibate de rewşa yew dekerasyonî ra vengdayîş dayê û nê vengdayîşî dima heme hetî ra yew gulbango pîl da û nê vengdayîşê gulbangî hema zî domîyeno la heta ewro zî hetê hukmatî ra yew gama şênbere nêameya eştene. No sebeb ra zî şarê kurd hema zî bawerîya xo bi dewlete nêano. Heta ke hetê dewlete ra game nêerzîyo û şar zî vano ke prosesî de dek û dolabî est ê.
Derheqê nê prosesî de şahîdê qirkerdişanê Hîzbûl-Kontrayî Abdurahman Turhalliyî rojnameyê ma rê qisey kerd. Turhalliyî dîyar kerd ke: “Verê veran Dewlet Bahçelî kursîyê xo ser o wirzîya şî destê DEM Partî tepişt û va, ‘Wa Rayberê PKK’yî bêro meclis de qalî bikero û PKK fes bikero û heqê hêvî ra feyde bivîno û serbest biveradîyo.’ Nê vatişê Bahçelî zaf muhîm bî. Bahçelî zî nêweş kewt û şîyayîşê psosesî hîna sist bî.”
‘Şert û mercî lazim ê’
Abdurahman Turhaliyî wina dewam kerd: “La peyê perdeyî de sewbîna çî est o. Kaykerdişê kayê kişikî de şah mat est o. Peyê nê perdî de şaho pîl zî Erdogan o û o zî nê warî de sirê xo nêdano teber. Nê sebebî ra zî şar dewlete ra bawer nêkeno û ewta de yew kayê şanokî est o; ‘Polîs o rind û polîs o xirab.’ Ewta de vatişê aştî û demokrasî zaf qîmetin o. Ganî wirdî hetan ra game bierzîyo. Wext lazim o û şertî merci lazim ê. Bi rewşa kongre senî asan kom bibo. Ganî hetê dewlete ra gamî bêrê eştene. Verên ra nêweşê hepsî û ê hepsîyê ke cezaya xo qedîyaya, serbest biveradîyê û dewlete şertê poşmaneyî wedarno.”
‘Ganî tecrîd wedarnîyo’
Tecrîdo ke Rayberê Şarê Kurdî Abdullah Ocalan ser o yo, Turhalli vano verê veren no tecrîd ganî bêro wedarnayene. Turhaliyî wina va: “Her çiqas ke roşanê remazanî de birazayê birêz Ocalanî û keyeyê tepişteyê bînan Îmralî de pêvînayîş biko û reyna emser rojbîyayîşê birez Ocalanî zî serbest bêro kerdene zî la reyna zî tecrîd dewam keno. Ancî zî nê eştişê gaman qîm nêkenê. Ganî hîna gamê muhîmî bêrê eştene. O wext awa leşine şêro û ganî awa zelale bibo ke, heme çî dîyar bibo.”
Abdurahman Turhalliyî wina peynîya vatena xo arde: Hêvîya mi est a ke nê prosesî de çîyo rind bivejîyo û şewqê aştî demokrasî biaso. Çîyo ke Rojawanî de virazîyeno ganî bibo nimûne û vakûrê Kurdîstanî de zî bivirazîyo.”
