HDPyî derheqê zêdîyayîşê hêrişan de eşkerayîyêka winayêne kerde: ”Nê hêrişê cînsîyî netîceya polîtîkayanê îqtîdarî de ya.”

Hemvervatoxanê Komîsyonê Domanan ê HDPyî Nuray Turkmene û Huseyîn Kaçmazî bi eşkerayîyêka nuştekîye vist vîrî ke kênaya Yusuf Zîya Gumuşelo ke ronayoxê Weqfa Hîranurî yo, bi serran binê nameyê ‘zewajî’ de raştê tecawuzî ameya, Manîsa de zî dewayêka tecawuzî eşkera bîya.

Dewamê eşkerayîye de wina ame vatene: “Manîsa de domana 12 serre dima ke hetê di camêrdanê pîlan ra ameye tecawuzkerdene, cayê domanan de ameye cakerdene û kewte binê pawitişê dewlete. La binê pawitişê dewlete de domane pavyonan de yena xebitnayene. No zî mojneno ke dezgehê pawitişê domanan û hêzê asayîşî senî yoz bîyê. No mîsal mojneno ke Tirkîya de serebûtê îstîsmarî senî bîyê sîstematîkî. Tirkîya de mal, dibistan, kuçe û pêro waranê cuye de domanî raştê îstîsmarî yenê. Ewro zî domanî asayî nîyê.

Amed de zî Serekê MHPyî yê Amedî Cîhan Kayaalpo ke tecawuzî ra yeno muhakemekerdene, mehkeme de vat ‘domane ci rê razî bîya.’

Nê hêrişê cînsîyî netîceya polîtîkayanê îqtîdarî de ya. Heta ke sucê kiştiş û îstîsmarî yê vera domanan eşkera nêbê do dewam bikerê. Ganî nê meseleyî cade bêrê çareserkerdene. Komîsyonê Domanan ê HDPyî seba ke pêro kerdişê vera domanan biqedê do mesuldarîya xo bikero. Ma do her ca de vengê domanan bidê eşnawitene.”