Seba ke 27ê Sibate de vengdayîşê Rêberê PKKyî Abdullah Ocalanî eşkera bî û hetanî ewro seba nê vengdayîşî mîyanê şarî de kombîyayîşî virazîyayî û ameyî munaqeşekerdiş. No sebeb ra zî Rayberê ÎHD’yî û pawitox Yakup Guvenî rojnameyê ma rê qisey kerd û Yakupî vat: “Meselaya kurdan meselayêka newîye nîya. Se serre ra zêdêr o ke na mesela çimeyê mexdurîyetê kurdan a û paweyê çareserkerdişî ya. 41 serrî yo ke riyê na mesela ra şerêk dest pêkerdo û bi hezaran însanî merdî yan zî birîndar bîyî”.

Yakupî wina ard ziwan û vat, seba ke no şer vindero û aştîyêk bivirazo ma sey Komela Heqanê Merdiman bi serran o ke xebitîyenê û têkoşîn danê. Çunke ma zanê ke şer çiqas bizedîyo, merdimê sivîlî zî hende mexdûr benê, heqê merdiman hîna zêde îxlal benê û mesela hîna têmîyan bena. Coka ma têkilîya mabênê serekê PKK’yî Abdullah Ocalanî û dewlete biqîmet vînenê. Seba ke no şer vindero û mabênê dewlete û kurdan de aştîyêk bivirazo, ganî nê dîyalogî bizedîyê. No semed ra ma deklerasyonê 27ê Sibate sey firsendêk vînenê. Nê deklerasyonî de herinda şerî de sîyaseto demokratîk pêşnîyaz beno.

Şarê kurd wazeno ke şer biqedîyo

Yakupî dîyar kerd ke nê prosesî ser o hetê komelê kurdan de di fikrî est ê. Hetêk ra kurdî bi heyecan ê. Wazenê no şer biqedîyo û na mesela çareser biba. Heto bîn ra zî bêbawerîye kurdan mîyan de est a. Nika ra verê zî çend rey prosesan dest pêkerd, la bi serkewtiş rayîr ra nêşîyî û dima ra şeranê hîna pîlan dest pêkerd. Na bêbawerîye biney zî dewlete ra peyda bena. Dewlete vana wa çekî bê şert û merc bêrê ronayîş. Serekê PKK’yî Abdullah Ocalan zî wina vano. Ma zî sey Komela Heqanê Merdiman wina fikirîyenê. Ganî şer, bê şert û merc biqedîyo. Çimkî heta şer nêqedîyo, îxlalê heqanê merdiman dewam kenê û çareserkerdişê na mesela hîna zor beno.

Qanûnê bingeyî de madeyê yewperestî bê şert û merc bêrê wedarnayîş

Yakupî wina qenêna û vat, la ma wina zî vanê: Ganî heqê kurdan zî bê şert bêrê qebûlkerdiş, Qanûnê bingeyî de madeyê yewperestî bê şert û merc bêrê wedarnayîş. Çunke ma zanê ke nê madeyê ke kurdan qebûl nêkenê, heta nêwedarîyê meselaya kurdan çareser nêbena. Qedînayîşê şerî çîyêko zaf muhîm o. La bi qedîyayîşê şerî zî rayîrê ma pawitoxanê heqanê merdiman nêqedîyeno. Rirê nê şerî ra bi hezaran sivîlî ameyê kiştiş, bi cînayetanê faîlî meçhulan însanî qetl bîyê, nezaretan de însanî ameyê vîndîkerdiş, dewî ameyê veşnayîş. Seba ke aştîyêka samîmîye bivirazo, ganî nê mexdurîyetî zî hetê dewlete ra bêrê qebûlkerdiş û nê însanan û merdimanê înan ra ozir bêro waştiş.