Vakurê Kurdistanî û Tirkîya de kedkarî zerarê şer, krîzo ekonomîk û feqîrîye anjenê. Seba înan fîrazkerdişê 1ê Gulane yeno manaya girse.
Hemserekê Sendîkaya Kedkaranê Weşîye û Xizmetanê Komelkîyan (SES) ya Colemêrgî Remzî Ozerî ard ziwan ke Colemêrg de qanûnê halê îstîsnayî yenê caardene û vat walîyî semedê fîrazkerdişê 1ê Gulane warê otogarî ke teberê bajarî de yo nîşan dayo. Ozerî vat: “Ma semedê ca û saetê aktîvîteya 1ê Gulane walîtîye û dezgehanê eleqedaran ê bînan de pêvînayîşî kerdî û înan yew cayo ke senî teberê bajarî bo mojna. Na neheqîye bi serran o yena kerdene. 1ê Gulane ke şarî ra qerifnaye yeno kerdene, qet manaya ci çîn a. Ma na rewşe şermezar kenê. Îqtîdar keno şarî bi vêşanîye terbîye bikero la o do rojêke miheqeq hesabê nê bido.”
Rojnamevan Salih Sertkalî zî ard ziwan ke sey kedkaranê bînan Tirkîya de şertê rojnamevanîye zî zehmet bîyî û vat: “Her roje hûmara rojnamevanê bêkaran zedêr bena. Pîya bi zextanê dewlete şertê xebatî zî zor bîyî. Rojnamevanîye zî mîyanê keranê ke heqê keda xo nêgenê de ya. Rixmê polîtîkaya çokdayîşî, rojnamevanê ke hetê heq û mazlûman de yê vera zextan milê xo çewt nêkenê est ê. Roja înan a 1ê Gulane fîraz bo.”
Mamosteyê tarîxî Adem Demiro ke 10 serrî yo tayînê xo paweno û mamosteyîya biyewmîye keno vat: “1ê Gulane de sere de mamosteyê ke nînê tayînkerdene ganî heme karker û kedkarî bibê yew. Ma kedkarî bi serran a tengayî ancenê. Ma kede danê la vera ci heqê xo nêgenê. Vera nê sîstemî ganî kedkarî 1ê Gulane de waran de bê. Eke ma bibê yew, ma eşkenê nê sîstemî birijnê.”
