Ronayoxanê Akademîya Ma Musicî ra Şêrko Kanîwarî dîyar kerd ke ê domananê kurdan muzîkî ra bêpar nêverdanê û wina vat: “Ma bi sloganê ‘Her ca de muzîk, her kesî rê muzîk’ têgêrenê û ganî her ca de xo biresnê kurdan.”
Vera teda, zorbazî, astengî û asîmîlasyonê serê kultur û hunerê kurdan şarê kurdî rayîr û metodanê têkoşînî aferneno. Akademîya Ma Musicî ya ke 2017 de Amed de awan bîye, nê dezgehan ra yew a ke serkêşîya têkoşînê vera asîmîlasyonî kena. Akademî xîret kena ke Kurdistan de bi taybetî Amed de kurdan muzîkî ra bêpar meverda. Heman wextî de zî xîret kena ke hetê teorîk û teknîkî ra muzîkî aver bera.
Ronayox û perwerdekaranê Ma Musicî dima ke Konservatuarê Aram Tîgranî hetê qeyûmî ra ame qefilnayene Akademîya Ma Musicî awan kerde. Ronayoxanê akademî ra Şêrko Kanîwarî ANFyî rê qala xebat û karanê înan kerde.
Kanîwarî da zanayene ke ey akademî ra verî Başûrê Kurdistanî de dest pê cigêrayîşê perwerdeyê muzîkî kerdo. Kanîwarî vat: “Ma hewceyê materyalan bîyî û ganî ma mufredatêkê perwerdeyî biviraştêne. Bi taybetî tradîsyonê Merkezê Kulturî yê Mezopotamya (MKM) ma rê ferz kerdêne ke akademîyêke bêra ronayene. Ma bi nê hîs û mesuldarî têgêrayî. Nika kreşî ra heta zanîngehî sîstemê ma yê perwerdeyî est o. Dima ke qeyûmê Konservatuarê Aram Tîgranî qefilna ma, wendekaranê ma û keyeyanê înan pîya Akademîya Ma Musicî awan kerde. Peynîya peynî de ma kurd ê û ma neçare yê ke bi hawayêkê etnîkî têbigêrê. Awankerdişê akademîyêka muzîkî karêko hende asan nîyo. Axir ma netîceyêka hole viste destî.
Akademîya ma wayîra tedeyîyêka zengîne ya û kadroyê ma jîhat ê. Binê nê atmosferî de ke tede deyîrê kurdî qedexe yê, perwerdeyê muzîkê kurdî ma rê hîsêko ercîyaye yo. Wextê Konservatuarê Aram Tîgranî de 400 wendekarê ma est bîyî. La nika tewr tay 2 hezar wendekarî seba perwerdeyê akademîye rêz de yê. Ma na akademî bi enerjî û îmkananê xo awan kerde. Keyeyê tay wendekaranê ma wayîrê îmkananê madîyan ê kêman ê la qet yew keye verê berê ma ra nê semedî ra anêgêra. Teberî ra beno ke akademîya ma sey luksî asena la hetê madî ra ma dezgehêk ê ke xîtabê her kesî kenê.”
Kanîwarî pare kerd ke perwerdekaranê Akademîya Ma Musicî wexto ke dest pê karî kerd soz da ke domananê kurdan muzîkî ra bêpar meverdê û vat: “Nameyê Ma Musicî ser o ma înşaetî de bixebitî zî û hewcedarîyanê akademîye wina peyda bikerê zî ma do domananê kurdan qetî muzîkî ra bêpar meverdê. Ma plan kenê ke Ewropa de zî şubeyêk abikerê. Ma wazenê keye û domanê kurdî her ca de xo biresnê dezgehanê muzîkî. Reyna ma wazenê Japonya de zî şubeyêkê mobilî abikerê. Japonya ra 30 keyeyan ma de têkilîye viraşte û waşt ke domanê înan perwerde bigêrê. Kurdî kamca de bibê ma zî uca de yê. Ma bi sloganê ‘Her ca de muzîk, her kesî rê muzîk’ têgêrenê û ganî her ca de xo biresnê kurdan.”
