Partîya Çep a Keske kongreya xo ya çarine 15ê teşrîna verêne de serûber kerde. Kurdistan û Tirkîya ra bi hezaran kesî tewrê kongre bîyî. Kongre de nameyê partîye sey Partîya Seyyewbînîye û Demokrasîyî ya Şaran (HEDEP) ame bedilnayene. Tulay Hatimogullari Oruç û Tuncer Bakirhan zî sey hemserekanê HEDEPî weçînîyayî. Kongre ra verî bi rojan cinîyan kombîyayîşî viraştî û problemanê cinîyan ser de ame vindertene. Konferans û kombîyayîşê şarî de meseleyan ser o qiseykerdişî virazîyayî û rêxistinbîyayîş ame rexnekerdene. Konferansî ra ver zî kombîyayîşanê şarî de xeylê rexneyî amebî kerdene û şar ame goşdarîkerdene. Bi no hawa rexnedayîşî zî dîyayî û semedê prosesê neweyî xerîta ameye dîyarkerdene. Konferans de tebî babetanê ke tewr zêde ameyî munaqaşakerdene ra yew zî babeta cinîyan û temsîlkarîya cinîyan bîye. Cinî çiqas rêxistinkerdene yî û çiqas temsîlkarîya înan esta ser de ame vindertene. Bi hezaran kesan semedê çaresarîya demokratîke ya meseleya kurdan a ke rojdemo bingeyên ê kongre bî, Îmrali nîşan da. Kongre de tewr zêde babeta tecrîd û cinîyan ameye munaqaşakerdene û ame vatene ke şîdetê vera cinîyan, qetilkerdişê cinîyan, vilabîyayîşê tîryakî, tecrîdkerdişê şarî û heme tepişteyê zîndanî girêdayeyê tecrîdê Îmraliyî yê.
Butçeya şerî
Sewbîna ame vatene ke îqtîdarê AKPyî wazeno heme destkewtişanê cinîyan û kurdan çînî bikero û nê semedî ra her hetî ra hêrişê cinîyan keno. Îqtîdar butçe şerî rê xerc keno, şarî keno feqîr. Butçeya ke şerî rê birîyena heme şaran ser de tesîr virazena û çaresernêkerdişê problemê kurdan rantweran hîna dewlemend keno.
Peymana Stenbolî
Yeno zanayene ke 20ê adara 2021î de şewêke de bi qerarê Erdoganî Peymana Stenbolî ameye feshkerdene. Badê Erdoganî weçînayîşan ra pey partîyanê dînperestan reyde pêkerd, qanûnê 6284î ke cinîyan paweno zî bî hedefê înan. Rejîmê Erdoganî hewl dano ke heme destkewtişanê cinîyan çinî bikero, cinîyan hepsê keyeyî bikero. Bado ke îqtîdarî hêz da camêrdan û ê her suc de bêceza verdayî hêriş, qetilkerdiş û her tewir sucê hemverê cinî û domanan zêdîyayî. Nika îqtîdar nê polîtîkayan de israr keno û hewl dano bibo welatêk ke bi şerîatî yeno îdarekerdene. Bi hawayêkê fermî nêbo zî rewşa Tirkîya ya nikayêne wina ya û bi şerîatê AKP-MHP-Huda Par û Yenîden Refahî yena îdarekerdene.
Netîceya kombîyayîşan de serê têkoşîn û heqanê cinîyan de perspektîf ame dîyarkerdene û yeno pawitene ke qerarê ke bêrî dayene vernîya şîdet, qetilkerdiş û pêro polîtîkayanê lêşinan yê hemverê cinî û domanan bigêrê. Babetê ke kongre de ameyî nîqaşkerdene rojanê verênan de sey rapor û qerar do bêrî eşkerakerdene.
