HDPyî serrgêra 44. ya Qirkerdişê Mereşî yad kerd û vat ke ganî dewlete nê qirkerdişî de bêra têrî.

Hemvervatoxanê Komîsyonê Şaran û Bawerîyan ê HDPyî Tulay Hatîmogullari û Turgut Okerî bi wesîleya serrgêra Qirkerdişê Mereşî eşkerayîyêka nuştekîye weşanaye.

Eşkerayîye de ame vatene ke 44 serrî verî 19-26ê kanûne de Mereş de vera elewîyan qirkerdişêk amebî kerdene û ewro zî Tirkîya de elewîyî bi aramî nêciwîyenê. Eşkerayîye wina dewam kena: “Hema zî gorê qurbananê Mereşî nêzanîyenê. Dosyayê arşîvî hetê Fermandarîya Hêzanê Sererdî ya Serekîya Artêşa Pêroyî de yê. Rixmê biranê mehkeme zî bi bahaneya ‘sirê dewlete yo’ nê dosyayî nêdîyenê avûkatan.

Ganî dewlete Qirkerdişê Mereşî de bêra têrî û arşîvan akera. Eke Meclîs de Komîsyonê Heqîqat û Edaletî bêro awankerdene no seba têrîameyîşî zî do bibo gamêke. Ma dejê Mereş, Çorum, Sêwaz û Roboskî zerrîya xo de hîs kenê. Ma reyna dîyar kenê ke ma qebul nêkenê ke Qirkerdişê Mereşî wa bêro vîrakerdene.”