Îdareyê HDPyî Qirkerdişê Armenîyan yad kerd û eşkerayîyêke daye: “Ma nê dejê 107 serrî pare kenê, hesanê xorinan ê armenîyan zerrî ra hîs kenê.”

Heyetê Rayraberdişê Merkezî yê HDPyî derheqê serrgêra Qirkerdişê Armenîyan de eşkerayîyêke daye.

HDPyî vat: ”Raştîya tarîxî de embazbîyayîş, mexdûran rê waştişê uzrî seba ameyoxêkê têdûştî gamêka musbet a. Seba averberdişê hîsanê wijdanî û edaletî, parekerdişê dejan, seba ameyoxêkê demokratîkî, haştîyane û têdûştî no yew rayîr o.

Şarê armenî û hemwelatîyê armenîyî, şaranê tewr qedîman ê na cografya ra yew ê. Hetê bînî ra dewleta armenîyan zî cîranê ma ya û warê dîplomatîk, bazirganî û ekonomîkî de têkilîya ma bi ci est a. Pê nê hîs û fikran, ma sey şarê tewr qedîmî yê Anatolîa û Mezopotamya, nê dejê 107 serrî pare kenê, hesanê xorinan ê armenîyan zerrî ra hîs kenê. Ma reyna qurbananê qirkerdişî bi minet û hîsgerî yad kenê.”