HDP û Partîya Çep a Keske yê ke kombîyayîşê xo yê merkezî qedînayî, do mabênê 17-27 hezîrane de şaristan, qeza, dewe û taxan de kombîyayîşanê şarî bikerê.
HDP û Partîya Çep a Keske kombîyayîşê xo yê merkezî viraştî û netîceyê weçînayîşî ercnayî. Kombîyayîşanê Meclîsê Partî û Heyetê Rayberdişî yê Merkezî de tayê birî gêrîyayî.
Goreyê biran şaristan, qeza, taxe û dewan de kombîyayîşê şarî do bêrê serûberkerdene. Yew zî bi îdareyanê şaristan û qezayan kombîyayîşê rexnekerdiş û xorexnekerdişî do bêrê serûberkerdene. Hem kombîyayîşanê şarî hem zî ê kombîyayîşanê bînan de rewşa rêxistinkî do bêro nîqaşkerdene. Temsîlkarê rêxistinanê komelê sîvîlî, rîspî, parlamenter û îdarekarê partîyan do tewrê nê kombîyayîşan bibê.
Dîya zanayene ke kombîyayîşî do 17ê hezîrane de dest pê bikerê û heta 27ê hezîrane biqedîyê. Kombîyayîşê şarî do wareyanê akerdeyan de bêrê serûberkerdene. Hemwelatîyî zî do tewrê kombîyayîşan bibê.
