HDP û HDKyî bi wesîleya serrgêra şehadetê înan Denîz Gezmîş, Huseyîn Înan û Yusuf Aslan yad kerdî.
Partîya Demokrtatîke ya Şaran (HDP) û Kongreya Demokratîke ya Şaran (HDK) bi wesîleya serrgêra şehadetê înan Denîz Gezmîş, Huseyîn Înan û Yusuf Aslan yad kerdî.
Eşkerayîya HDPyî de nê ameyî vatene: ”Denîz Gezmîş, Huseyîn Înan û Yusuf Aslan ê ke bi cînayetêkê sîyasîyî ameyî qetilkerdene şehadetê înan ser o 49 serrî ravêrtî. Bi nê cînayetî yo ke 6ê gulana 1972 de ame kerdene, ame waştene ke şextê Denîz, Huseyîn û Yusufan de waştişê azadîye û şorişî yê şaranê Tirkîya bero aliqnayene. La pê aliqnayîşê hîrê leyan têkoşîn nêqedîya, herinda nayî de sere de Denîz, Huseyîn û Yusuf înanê ke rayîrê haştîye û waybiratîye de cuya xo vînî kerde zerrî û têkoşînê bi mîlyonan de bîyî bêmerg û waştişê şoriş û bedilnayîşî yê komelî pîlêr bi. Meşaleyê azadîye ke Denîzan, Mahîran, Mazlûman û Îboyan tafîna rayîrê ma pêrune ke têkoşîn kenê, roşn keno.
‘Ma heme şehîdanê şorişî bi hurmet yad kenê’
Êyê ke vizêr bîyî sebebê qetillkerdişê hîrê leyan ewro muxalîfan erzenê zîndanan û cehd kenê ke partîya ma biqefilnê û pê derbeya sîyasîye îradeyê şarî xesp bikerê. Berpirsîyarê vizêrî ewro şermî ra nêeşkenê vejê mîyanê komelî, ê ewro zî eynî şermî rê mehkum ê. Sey vizêrî ewro zî do şorişgerî, têkoşerî milê xo çewt nêkerê, sereberz ver bi ameyoxî şirê. Ma şexsê Denîz û Huseyîn û Yusufan de heme şehîdanê şorişî bi hurmet yad kenê. Ma do wayîrê mîrasê înan vejîyê û têkoşînî pîlêr bikerê.”
‘Ma do têkoşînî rê dewam bikerê’
HDKyî zî şexsê Denîz Gezmîş, Huseyîn Înan û Yusuf Aslanî de heme şehîdê şorişî yad kerdî û vat: ”Înan demêkê lêlî de waştişê waybiratîya kurdan û tirkan ard ziwan û semedê heqê kedkaran û dewijan qîrayî û zerrîya bindestan de ca girewt . Ewro yeno waştene ke kedkarî wa bibê kole, xoza yena rijnayene, têkoşînê azadîye yê şaran bi hêrişan yeno waştene ke bêro şiknayene. Pê operasyonanê qirkerdişî û darbeyanê sîyasîyan wazenê şarî teslîm bigîrê. Ma do verê zext û hêrişan de milê xo çewt nêkerê û têkoşînî rê dewam bikerê.” Çime: Anf
