HDP: ”Mutabeqatê Dolmabahçe hem firsendêko tarîxî hem zî noqtayêka girînge ya sîyasî bi. Tek rayîrê çareserîye Mutabeqatê Dolmabahçe yo.”

Heyetê Rayberdişê Merkezî yê HDPyî bi wesîleya serrgêra Mutabeqatê Dolmabahçe eşkerayîye daye.

Eşkerayîye de wina ame vatene: ”28ê sibata 2015î seba demokratîkbîyayîşê Tirkîya û çareserîya meseleya kurdan berêko tarîxî amebi akerdene. Mutabeqatê Dolmabahçe rayaumûmîye de amebi parekerdene û xerîtaya demokrasî, azadî û hêvîya haştîye ya komelê Tirkîya amebî îlankerdene. Mutabeqatê Dolmabahçe tarîxê komare de belgeyo tewr girîng bi ke haştîye û demokrasî rê ber akerd.

Mutabeqatê Dolmabahçe de rayîr û metodê çareserîyanê meseleyan ameybî vatene. Mutabeqatê Dolmabahçe hem firsendêko tarîxî hem zî noqtayêka girînge ya sîyasî bi. La AKPyî şer tercîh kerd û mutabeqat înkar kerd. Bi şerê giranî û tecrîdê Îmraliyî cewab da mutabeqatî. Tecrîd bi rejîmê îdareyî.

Krîz, serebûtê globalî û rîskê jeopolîtîkî mojnenê ke ganî reyna mutabeqat abigêro. Seba ke Tirkîya krîzanê xo ra bixelisa û krîzê globalî kêm bibê no agêrayîş lazim o. Coka ma venga pêro aktoranê sîyasîyan ê Tirkîya danê ke abigêrê mutabeqatî û têna ewroyê ci nê ameyoxê ci zî bixelisnê. Tek rayîrê çareserîye Mutabeqatê Dolmabahçe yo.” ANQARA