Parlamentera HDPyî ya Amedî Dersim Dage derheqê vîjnayîşî de tayê ercnayîşî kerdî û wina vat: “HDP a partîya ke her hetî ra do qederê vîjnayîşî dîyar bikero. Heme anketan de yeno vînayene ke HDP paştî bido kamyew namzedê serekkomarî o eşkeno ser bikewo.”

Dage vîst vîrî ke wextê îqtîdarê AKP-MHPyî de şar senî tengayî anceno û vat:  “Partîya ma goreyê çarekerdişê problemanê welatî têgêrena. HDP a partîya ke her hetî ra do qederê vîjnayîşî dîyar bikero. Heme anketan de yeno vînayene ke HDP paştî bido kamyew namzedê serekkomarî o eşkeno ser bikewo. Îtîfaqê AKP-MHPyî seba ke hêzê HDPyî ra terseno her hetî ra hêrişê ci keno. Îqtîdar çend kewno tengayî û vîneno peynîya ci nêzdî bîya, zafêr hêrişê şaran keno. Pê vilakerdişê faşîzmê xo wazeno hegemonyaya xo zixm bikero. Hema hema pêroyê vîjnayoxê HDPyî ameyî hepskerdene. Şaredarîyanê kurdan de qeyûm ame cakerdene. Heqê vîjnayîşî ame xespkerdene.”

Dage qiseykerdişê xo rê wina dewam kerd: “Îqtîdar şerî kirişeno teberê sînorî, wazeno Rojawan de destkewteyanê kurdan çîn bikero. Seba ke kurdî bêrê qirkerdene heme çimeyê welatî fînayî xizmetê Rûsya, Esad û Amerîka. Tecrîdî xorî keno. La se keno wa bikero do têkoşînê şaran ser bikewo. Vîjnayîş semedê xelisnayîşê şaran şansêk o. Îtîfaqê Kede û Azadîye semedê şaran rayîrêko newe akerd. Pê dewaya qefilnayîşî û birnayîşê hetkarîya xezîne nêeşkenê verê ma bîgêrê. Ver bi vîjnayîşî hêrişê îqtîdarî do zafêr bibê. No vîjnayîş vîjnayîşê AKP-MHPyî ra hesabpersayîşî yo. Se beno wa bibo ma do nê îqtîdarê faşîstî rê milê xo çewt nêkerê.”