HDP bi wesîleya serrgêra Terteleyê Dêrsimî eşkerayîyêke nuştekî da û vat ke Dêrsim de hema zî caardişê yew ziwan û yew bawerî yeno kerdene û hema zî asîmîlasyos dewam keno ewja de.
Hektara Hemserekê Pêroyî yê Partîya Demokratîke ya Şaran (HDP) Tulay Hatîmogullari ke Komîsyonê Bawerî û Heqanê Şarî ra berpirsîyar a, bi wesîleya 4ê gulane ke tarîxê dest pêkerdişê qetlîyamê Dêrsimî yo, eşkerayîyêke nuştekî daye.
Goreyê dayeyanê fermî Terteleyê Dêrsimî de 13 hezar kesî merdî, goreyê çimeyanê herême zî 50 hezarî ra zêde kesî ameyî qetilkerdene û bi des hezaran kesî zî ameyî surgunkerdene.
Hatîmogullariye dîyar kerde ke dêrsimijî 4ê gulane rê vanê ‘Roca Şaê–Yas Günü’ û no qetlîyam vera bawerîya kurdê kizilbaş û nasnameya bawerîye de ame kerdene û va: “Lazimîya komelî bi rî bi rî mendişê qetlîyamî reyde esta. Ganî Dêrsimo ke wayîrê felsefeyêk bi yew çimêk ewnîyeno 72 şaran, bêro pawitene. Ewro Dêrsim de hema zî caardişê yew ziwan û yew bawerî esto û asîmîlasyos dewam keno. Semedê aşitî ganî nê caadişan ra fek bêro veradayene. Ganî pêroyê şar û bawerîyê Mezopotamya û Anatolî bigîrîyê binê pawitişî.”
Hatîmogullariye dewamê eşkerayîye de înan vat: “Ganî Qetlîyamo ke 84 serrî verê cû ame kerdene ra ozurêk fermî bêro waştiş. Ganî cayê mezelê Seyîd Riza û hemrayê ci yê ke 1937î de 15ê Teşrîna Peyêne de ameyî aliqnayene, bêro aşkerakerdene. Ganî arşîvê 1937-1938î bêro aşkerakerdene ke çende merdimî merdî û belgeyê domanê ke qetlîyam ra dima ewladî dîyayî bêro eşkerakerdene. Lazimîya cografyaya ma her çî ra ver aşitîyêka komelkî rê esta. Ma ê ke Terteleyê Dêrsimî de cuya xo vînî kerdî yad kenî.” ANQARA
