HDP 6ê tebaxe de Amed de û 7ê tebaxe de Stenbol de bi şîarê ‘Çareserî ma yê, şer û îşxalî rê ney’ mîtîng keno.
Partîya Demokratîke ya Şaran (HDP) 6ê tebaxe de Meydanê Îstasyonî yê Amedî û 7ê tebaxe de Kartalê Stenbolî de bi şîarê ‘Çareserî ma yê, şer û îşxalî rê ney’ mîtîng organîze kerd. Semedê dewrbîyayîşê mîtîngan xebatî dewam kenê.
Çarçewa xebatanê mîtîngî de parlamenterê HDPyî zî tede heyetî semedê tewrbîyayîşê mîtîngî dewe-dewe û keye-keye gêrenê. Vizêr qezayan Çinar, Bismil, Sûr, Peyas û Rezan de xebatî ameyî kerdene. Parlamentera HDPyî Felaknas Uca, Meral Daniş Beştaş, Remzîye Tosun, Huseyîn Kaçmaz, Sezaî Temellî û Dersim Dage tewrê xebatan bîyî. HDPyijanê ke dewe û esnafî zîyaret kerdî raştê eleqeya şarî ameyî. Zîyaretan de parlamenteran hêrişê vera Rojawan û Başûrê Kurdistanî vist vîrî û vat ma pêro pîya tewrê mîtîngî bibê û vera şerî vengê xo berz bikerê.
Êlih de zî semedê tewrbîyayîşê mîtîngê Amedî eşkerayîya çapemenîye ameye kerdene. Vervatoxa Meclîsê Cinîyan ê HDPyî Ayşe Acar Başarana ke eşkerayîye de qisey kerd vat ê do ameyoxê azadî înşa bikerî û veng da şarê bajarî ke wa tewrê mîtîngî bibo.
Stenbol de semedê mîtîngîyo ke do 7ê tebaxe de Kartal de bêro kerdene xebatî dewam kenê. Çarçewa tewrbîyayîşê mîtîngî de HDPyijan pîya bi parlamentere Serpîl Kemalbaye bajar de broşurî vila kerdî.
