Hemsereka Pêroyî ya DEM Partîye Tulay Hatîmogullari tewrê şînê Ahmet Gunî bîye û wina vat: “Dejê ma pîl o, hêrsê ma zaf o. No cînayetêko sîyasî yo.”

Hemsereka Pêroyî ya DEM Partîye Tulay Hatîmogullari, Hemserekê DBPyî Keskîn Bayindir, Vervatoxa DEM Partîye Ayşegul Dogane, Parlamenterê DEM Partîye Newroz Uysal Aslane û Zekî Îrmez, Mayê Aştîye, endamê TJA tewrê şînê Ahmet Gunî bîyî.

Hemsereka Pêroyî ya DEM Partîye Tulay Hatîmogullari şîn de qisey kerd û vat: “Dejê ma pîl o, hêrsê ma zaf o. No cînayetêko sîyasî yo. Embazê ma Ahmet welatperwer, kedkar, şorişgêrêk bî. Ey tim seba şarê xo têkoşîn kerd. Nê sebeban ra zî o ame qetilkerdene. Dewlete sîstemê cerdevanan pêro Kurdistanî ra vila kerdo. Nê kontrayî vera şarê kurdî têgêrenê. Wa çew pê kayanê înan mexapîyo.

Nê hêzê kontrayî yê çekdarî provokasyonan kenê, bazirganîya narkotîkî kenê, merdiman qetil kenê. La ma do vera înan têkoşînê xo rê dewam bikerê. Feraseto ke dejê Roboskî bi ma dabî antene embazê ma Ahmed zî qetil kerd.”