Hatay de bi ameyîşê hêzanê çekdaran ê dewleta tirke serebûtê dizdîye û talanî zêdîyayî. Polîso tirk vera dezgehanê şorişgêr û welatperweran provokasyonan keno.

Hêzê dewleta tirke  wazenê Hatay de mabênê şarî û hêzanê şorişgêr û welatperweran ê ke roja verêne ya erdlerzî ra paştî danê mexduranê erdlerzî, bixeripnê. Hêzê dewleta tirke seba ke serebûtanê dîzdîyê bierzê milê şorişgêran, şewe gama ke şar rakewtene, herêmanê hetkarî yê ke  hetê şorişgêran ameyî ronayene ra, waşt ke verbendikanê şorişgêran bidiznê.

Şorişgêranê ke ANFyî rê qisey kerd, vat: ”Nê cehdkerdişê dîzdîye ke çend rey ame kerdene de, kesêk ame tepiştene û kuwayene. Dima ra no kes rema şi cayê polîsan. Polîsan o pawit û bi vatişê, ‘şima hêrişê polîsan kenê’ vera şorişgêran nêrazîbîyayîş mojna. Roja bîne kesêk ame vat ‘şima rind gureyenê, verbendikêk bidê ez zî şima reyde  bigurîye.’ Ma biney şîyî ey ser, reyna polîsî ameyî o berd. Wazenê ke bi nê verbendikanê ma dizdîye bikerî û şorişgêran sûcdar bikerê ke wa mabênê şorişgêran û şarî abibo.”

Hetê bînî ra dezgehê ke nêzdîyê AKPyî yê bi waştişê xirab mojnayîşê şoirşgêran, mîyanê şarî de vanê ‘ê terorîst ê, hetkarîya înan megêrê.’

Hatay de dewleta tirke ya ke roja çarine verî bi ameyîşê leşkeran xo mojna, roja bîne polîsê TEMî û ajanê MÎTî şawitî bajar. Bajar de nika eşkera yeno vînayene ke senî zaf polîs û ajanî est ê. Polîsê TEMî û ajanê MÎTî bitaybetî nêzdîyê waranê ke şorişgêr û welatperwerî de hetkarî vila kenê de ameyî cakerdene. Nê kesê ke kuçeyan de bi wesayîtanê sîvîlan gêrenê, bitaybetî waranê şorişgêran de kesê ke hetkarî vila kenê, înan teqîp kenê, nasname persenê û bi destbendkerdişî tehdît kenê.

Komel û weqfê ke bi nêzdîbîyayîşê AKP-MHPyî yenê naskerdene, roja hîrêne kewtî bajar. Teberê înan de Komeleya Tirkanê Ahiska û Weqfê Fetîhlerî yê ke pabesteyê MÎTî yê zî bale ancenê xo ser ke xeymanê AFADî yê ke nêdîyayî şarî de manenê û leşkerî înan rê hetkarî kenê. Reyna kesê ke bi verbendikanê Weqfê Dîyanetî bajar de gêrenê, ferman danê polîsan.