Hatay de elewîyanê ereban seba vîrardişê kesanê ke erdlerz de şîyî rehmet, hirîsî viraşt.
Elewîyanê ereban ê ke Hatay ra yê, seba vîrardişê kesanê ke erdlerzê Mereşî de dinyaya xo bedilnaya, hirîsî viraşt.
Hirîsî hîna zaf roşanan de yeno viraştene, la na rey seba kesanê ke erdlerzî de dinayaya xo bedilnaya, ame viraştene. Şaredarîya Defne ke zafîya ci de elewîyî ciwîyenê, seba ê kesanê ke erdlerzî de dinyaya xo bedilnaye hirîsî viraşt.
Mehmet Sultanoglu yo ke bi serran o serekîya Komeleya Hetkarîya û Paştîdayîşê Komelkî ya Taxa Akdenîzî kerda, ard ziwan ke erdlerzî tewr zaf zirar dayo elewîyan û vat, ‘‘Seba ke reyna nê tewir felaketî nêbê, ma hirîsî viraşt ke bi nameyê aşûre yeno zanayene. Ma pîya bi hemkarîye sey kulturê xo viraşt.’’
Sultanogluyî da zanayene ke hema zî cenazayê înan binê xirban de yê û vat ke dejê înan zaf giran o, seba ke ê bieşkîyê bêrê pêser wext lazim o.
