Parlamentera DEM Partî ya Mêrdînî Bêrîtan Guneşe ard ziwan ke perwerde bi tirkî domananê kurdan de travmayan virazeno û wina vat: “Ganî perwerde bi ziwanê dayîke bêro dayene.”

Bêrîtan Guneşe da zanayene ke bi ferzkerdişê perwerdeyê bi tirkî domananê kurdan de travmayî virazîyenê û vat: “Qiseykerdişê bi tirkî domanan rê yeno ferzkerdene. Kurdistan de mîqtarê teriknayîşê dibistanan zaf o. Sebebê ney zî o yo ke mîyanê perwerdeyî de tedaya psîkolojîke yena kerdene ke na rewşe vera Peymana Heqanê Domanan a. Peymane de yena vatene ke ganî şert û mercî goreyê îstîfadekerdişê domanan bibê. Seba ke domanî xo hol îfade bikerê û hîs bikerê ganî perwerde bi ziwanê dayîke bêro dayene.”

Guneşe ard ziwan ke polîtîkayê asîmîlasyon û înkarî se serrî yo dewam kenê û sernêkewtiş de sûcêkê domanan çin o. Guneşe vat: “Sey psîkologanê kurdan ma tim ney ser de vindenê. Ma vanê ke seba ke bi ziwanê dayîke perwerde nêgênê domanî nêeşkenê tewrê cuye bibê. Vanê ke Kurdistan de serkewtişo akademîk kêm o. Sebebê ney zî o yo ke domanî seba ke bi ziwanê dayîke perwerde nêvînenê adapte nêbenê. Eke heqê ziwanê dayîke domanan ra yeno girewtene o çax hinî nêeşkenê nê domanan sey neserkewte îlan bikerê. No çi meseleya sîstemî ra. Ganî sîstemê perwerdeyî bêro newekerdene, heqê perwerdeyê bi ziwanê dayîke bêro caardene û sîstemo newe goreyê usûlanê zanistî bêro awankerdene.”