Hemvervatoxa HDPyî Ebru Gunaye Amed de eşkerayîya çapemenîye kerde û wina qisey kerd: “Birêz Ocalano ke binê tecrîdî de yo aktorê çareserîya meseleya kurdan o.”

Hemvervatoxa HDPyî Ebru Gunaye bînaya DBPyî ya Amedî de kombîyayîşê çapemenîye kerd û rojdem ercna.

Gunaye verî qurbanê Qirkerdişê Şingalî yad kerdî û bale ante hêrişanê Tirkîya yê vera Şingalî ser. Gunaye vat: “Hêriş û qirkerdişê vera êzidîyan bêmabên dewam kenê. La êzidîyî do bibê hîna qewetin û nasnameyê xo bipawê. Qirkerî zî temamîya tarîxî de tim bêrê naletkerdene.”

Gunaye bale ante rewşa Aysel Tugluke ser û vat: “Mehkeme pê zorî Dewaya Kobanê de îfadeyê Aysel Tugluke gêna. Aysele Tugluke nêweşa demansî ya û îdareyê zîndanî seba nuştişê waştişnameyî ci rê teda keno. Dezgehê Tipê Edlîyî nêweşê demansî Çevîk Bîrî rê raporê pozîtîfî dano la Aysel Tugluke rê raporê negatîfî dano. Seba ke Aysel Tugluke cinîya kurde ya ci rê wina yeno kerdene. Veranêdîyayîşê Tugluke dişmenîya vera kurdan a, îşkenceyo eşkera yo û kerdişêkê polîtîkaya rehîneyan o.  Ewro tepişteya sîyasî Makbule Ozere rê huqûqê dişmenîye yeno caardene.

Partîya ma bi şîarê ‘Çareserî ma yê, şer û kolonyalîzmî rê nê’ 6ê tebaxe de Amed de û 7ê tebaxe de Stenbol de mîtîngan bikera. Ma venga şarê xo danê ke bi xurtî tewrê nê mîtîngan bibê. Ma pîya çareserîye vajê û vera şerî wurzê we. Ma do mîtînganê xo de vera tecrîdî têbigêrê. Birêz Ocalano ke binê tecrîdî de yo aktorê çareserîya meseleya kurdan o. Bi tecrîdkerdişê Ocalanî vengê komelî yeno birnayene. No bêhuqûqî, metodêkê faşîzmî û zorbazî yo. Ma do bi xurtî vera ney vejîyê.”