Vervatoxa HDPyî Ebru Gunaye bale ante pêvînayîşê Nêçîrvan Barzanî û Erdoganî ser û vat: ”No fotograf tesdîqê hêrişê vera kurdan o. Fotografê tesdîqê polîtîkaya şerî, dişmenîya vera kurdan a. Vera na dişmenîye tewirê xo eşkera bikerê.”
Dewleta tirke bi hewayêkê hemwextî hêrişê di letayanê Kurdîstanî kerd. Badê hêrişî vizêr Serekê Herêma Kurdîstanê Federalî Neçîrvan Barzanî û Serekkomarê tirkî Recep Tayyîp Erdogan qesr de ameyî têhet. Vervatoxa HDPyî Ebru Gunay Merkezê Pêroyî yê HDPyî de kombîyayîşê çapemenîye de rojdem ercna.
Qiseykerdişê Gunaye ra beşêk wina yo:
”Vervatoxê AKPyî û selahîyetdarê îqtîdarî binê nameyê ‘terorî’ de nê hêrişan meşrû kenê. Her kes zaneno ke îqtîdarê AKP-MHPyî sivîlan dano bombayan ver. Hêrişê vera sivîlan qet nêeşkenê bêrê meşrûkerdene. Îqtîdarê AKP-MHPyî sûcanê şerî rê dewam keno.
Wextê nê hêrişî yenê kerdene hukmatê Herêma Kurdîstanî bêveng o. Hêrişan ra dima Nêçîrvan Barzanîyî Tirkîya zîyaret kerde, qesre ra fotografêk ame vilakerdene. No fotograf tesdîqê hêrişê vera kurdan o. Fotografê tesdîqê polîtîkaya şerî, dişmenîya vera kurdan a. No fotograf nîşaneya paştdayîşê şerî ya û qet nêno qebulkerdene. Ez venga hukmatê Herêma Kurdîstanî dana ke vera na dişmenîye tewirê xo eşkera bikerê û seba ameyox, destkewte û haştîya kurdan tewirê xo bimojnê.
Vera kurdan û ziwanê kurdkî hêriş û zorbazîye dewam kenê. Vera tepişteyanê nêweşan zî hêrişê giranî yenê kerdene. Tewr peyên Şingal, Mexmûr û Dêrik de hêrişî ameyî kerdene. Ma zanenê ke îqtîdar seba ke DAÎŞî gandar bikero nê hêrişan keno, wazeno qesasê DAÎŞî bigêro. Nê hêrişê sivîlî sûcê merdimîye yê. AKP sûcanê merdimîye keno.
Rewşa zîndanan her roje bena giranêr. AKP-MHPyî zîndanî vurnayê cayê mergî û îşkencexaneyan. Tewr peyên Zîndanê Boluyî de nêweş Mehmet Hanîfî Bîlgînî dinyaya xo bedilnaye ke 5 mengî mendbî ke do bivejîyo teber. La îqtîdarî cenazaya ci teslîm kerde. Ma nê kerdişan û caardişanê îqtîdarî qebul nêkenê. Nika Wan û Amed de keyeyê tepişteyî nobeta edaletî gênê. Ma venga rayaumûmîye danê ke hişyar biba. Ganî Aysele Tugluk û nêweşê bînî bêrê veradayene.” ANQARA
