Berdevka Partiya Demokratîk a Gelan (HDP) Ebrû Gunay li Navenda Giştî ya partiya xwe civîna çapemeniyê li dar xist û geşedanên di rojevê de nirxandin.
Pêvajo krîtîk e
Gunayê diyar kir ku destwerdana li dijî pêvajoya hilbijartinê dest pê kiriye û got: “Her ku em ber bi hilbijartinê ve diçin êrişên li dijî partiya me û partiyên hêzên sosyalist û derdorên demokratîk zêde dibin. Em doza girtina li ser partiya me jî ji nêz ve dişopînin. Di vir de mesele demokrasiya Tirkiyeyê ye û îktidar dixwaze bi van êrişan rejîma xwe ya faşîst bide avakirin. Di vî warî de êdî Tirkiye ketiye riyeke dîrokî û pêvajoyek krîtîk û veqetînê.”
Doza Kobanê ya qelp pûç bû
Gunayê der barê Doza Kobanê de axivî û da zanîn ku faşîzm gav bi gav tê avakirin û ji bo vê yekê jî ev doz weke mînak nîşan da û got: “Ji destêpêkê ve ev doza kûmpasê gav bi gav têk çû. Wê dozger der barê Doza Kobanê de di 6-7-8’ê sibatê de mutalaya xwe aşkera bike. Ev dozeke hiqûqî û qanûnî nîn e. Dema em dibêjin mutala jî em behsa belgeyeke hiqûqî nakin. Dozger wê metna kûmpasa îktidarê û fermana îktidarê deklare bike. Em hemû kirinên wan ên qirêj aşkera dikin. Lewma bi ser partiya me ve tên û em dibêjin hûnê bêtir bitirsin. Çimkî kûmpasên we têk diçin û hûn ê nikaribin xwe ji bin vê rûxandinê rizgar bikin û hûn ê di bin tariyê de bimînin.”
Em ê ber bi Îmraliyê bimeşin
Gunay bal kişand ser meşa ku di 6’ê sibatê de li navçeya Gevera Colemêrgê û navçeya Qosera Mêrdînê bi dirûşma “Em ji bo çareseriyê ber bi Îmraliyê ve dimeşin” bê lidarxistin û wiha axivî: “Helbet sedemên sereke krîza rêveberiyê ya li Tirkiyeyê tecrîd û polîtîkayên şer ên ji aliyê hikûmetê ve tên meşandin e. Tecrîda li girava Îmraliyê ya li ser Ocalan, nêzîkatiya li hemberî pirsgirêka kurd e. Israra îktidarê ya di polîtîkaya tecrîdê de ew e ku xwe li ser piyan bigire. Mafên qanûnî yên birêz Ocalan hatine desteserkirin. Bi taybetî jî qedexekirina hevdîtina malbat û parêzeran her cure polîtîkaya tecrîdê nîşanî me dide. Desthilatdarî bi tecrîdkirina birêz Ocalan dest bi polîtîkaya tecrîdê kir û a niha li her bihostê Tirkiyeyê belav kiriye. Tecrîd li dijî hemû kurdan û muxalîfan e. Ji ber vê yekê em di parastin û parastina azadiyê de li dijî tecrîdê û aştiya li dijî şer israra xwe didomînin.
Werin ji bo meşê tevî me bibin
Di vê çarçoveyê de Koma me ya Meclîsê li ber Wezareta Dadê dest bi Nobeda Edaletê kir û ji ber astengiyan niha nobed li ber Meclisê tê girtin. Ev nobed îro ket meha duyemîn. Partiya me jî di nav de gelek komên demokratîk dibêjin, ‘Em ji bo çareseriyê ber bi Îmraliyê ve dimeşin’ û em ê di 6’ê sibatê de ji Gever û Qoserê dest bi meşê bikin. Tecrîd wê bi civînên gel, panel û daxuyaniyên girseyî pêk werin. Wê her kêlî qala tecrîdê bê kirin û nerazîbûn li dijî tecrîdê bê nîşandan. Di her qadê de wê were destnîşankirin ku bêyî şikandina tecrîdê gel nikare nefesê bigire. Em ê bibêjin ‘Em ji bo çareseriyê ber bi Îmraliyê ve dimeşin’. Ji ber ku em baş dizanin ku birêz Ocalan yek ji aktorên siyasî yê herî girîng e ku li vî welatî çareseriyê temsîl dike. Birêz Ocalan yek ji aktorên herî girîng ê vî welatî ye ku encaman ji bo berjewendiya gel diafirîne. Ji ber vê yekê yên di xetimandinê de israr dikin, di polîtîkayên tecrîdê de israr dikin û didomînin ew in.”
