Almanya de qurbanê qirkerdişê Gumgum, Roboskî û zîndanan ameyî yadkerdene.

Ulm de serkêşîya ADGByî de Merkezê Kulturî yê Elewîyan ê Ulmî û Cemxaneyê Ulmî de merasîmêk virazîya. Merasîm de derheqê Qirkerdişanê Gumgum, zîndanan û Roboskî de sînevîzyonêk zî ame mojnayene. Dima beşdaranê merasîmî qala qirkerdişan kerd. Parlamenterê verênî Faysal Sariyildizî merasîm de  qurbanî yad kerdî û pare kerd ke hişmendîya qirkere ya dewleta tirke ewro zî dewre de ya. Merasîm de hunermend Şenol Akdagî lawikî vatî.

Mannheim de serkêşîya Merkezê Komelê Demokratîkî yê Kurdan û Federasyonê Elewîyanê Demokratîkan de merasîmêk ame kerdene. Qiseykerdişan de bale ameye antene hêrişanê îşxal û qirkeran ê dewleta tirke ser.

Şaristanê Hamburgî yê Almanya de serkêşîya Yewîya Hêzî ya Demokratîke (DGB) de mîtîngêk ame kerdene. Mîtîngî ra dima eşkerayîye ameye wendene û tede ame vatene ke dewleta tirke kurdan rê heman qirkerdişî ferz kena. Mîtîng de pankarta ‘Tepişteyanê sîyasîyan rê azadîye’ ameye akerdene û bêmabên sloganê sey ‘Şehîdê şorişî bêmerg ê’ ameyî vatene.