Çalakîya grevê vêşanîye a ke vera tecrîdê serê Rayberê Şarê Kurdî Abdullah Ocalanî û binpaykerdişê heqê ê zîndanan dîya dest pêkerdene, roja 150in de bi grûba 30. dewam kena
Îqtîdarê AKP-MHPyî badê xoverdayîşê zîndanî vera tepişteyan zext û hêrişî zêdînayî. Tepişteyê bîlasebeb raştê cezayan yenê, înfazê înan yenê vêşnayene û heme heqê înan yenê binpaykerdene. La rixmê heme zehmetîyan tepişteyî qerardar çalakîya xo rê dewam kenê.
Tepişteyî wazenê ke wa tecrîd bêro wedaritene û Rayberê Şarê Kurdî azad bo. Îqtîdarê tirkî tewirê xo yê tehlukeyinî domneno. 25ê adare de Rayberê Şarê Kurdî birayê xo Mehmet Ocalanî dir telefon de qisey kerd. Gama ke înan hema qiseykerdêne telefon birîya.
HDPyî vera birnayîşê telefonî eşkerayîye daye. Vervatoxa Partîya Demokratîke ya Şaran (HDP) Ebru Gunay bale ante birîyayîşê pêvînayîşê telefonî yê bi Rayberê Şarê Kurdî ser û vat: ”Qesawet zêdîya. Îmrali de se beno?” Gunaye ard ziwan ke ganî cade Ocalanî reyde pêvînayîşê rî bi rî bêro kerdene.
Mexmûr
Kampa Multecîyan a Şehîd Rûstem Cûdîyî (Mexmûr) de zî rayberîya cinîyan de vera tecrîdê Îmraliyî 18ê kanûne de grevê vêşanîye dîyabi destpêkerdene. Çalakîya ke Dezgehê Keyeyanê Şehîdan de yena kerdene roja 129. de dewam kena.
Yunanîstan
Kampa Lavrioyî ya Yunanîstanî de zî vera tecrîdê Îmraliyî û seba paştdayîşê tepişteyan rayberîya TCŞ, TJK-E û Merkezê Kulturê Kurdîstanî de grevê vêşanîye dîyabi destpêkerdene. Grevê vêşanîye roja 112. de dewam keno.
