Reqs, dans û govende şarê kurdî rê suc ê. Ma biewnê ku Tirkîya de halê gencan senîn o. Kuçeyan de, teber ra eger gencî bi maddeya tiryakî, bi dizdîye û bi fuhuş bêrê naskerdiş, hete hukumatî de problem çin o. Hukumat bi serrano ku nê rayirî vernîya gencan de akeno û wazeno ku gencî xo nasnêkerê. Qanûn semedê nê sucan qet çîyêk nêkeno. Eyro bierze zîndan, siba înan vecenê teber û wazenê civak bi nê merdiman bigureyo.

Ceza ku qanûn de ya semedî înan derbas bena, pêro xirabîyî civakî ser o yê. Ju qanûn çin o ku hetê islahbîyayîşê înan rê. Gencê ku xo nas kenê û civak de wazenê ca bigêrê, rayîrê înan zî tim gurote yo. Vernîya înan nêbena a. Bi hezaran mezunê zanîngehan est ê. Bi hezaran zîndanan de tenê ziwanê xo de xeberdayîşî ra ameyî girotiş. Gelo kamco suc o yan zî civakî rê kamco rewşe fayde dana?

Rewşa ku bî maddeyanê tiryakî ti civak de be yan zî ti xo nas bikerê û gorewê na rewşe cuyayîş bikerê? Çend rojî verê coyî şaristanê Mersînî de çend gencan xo rê sahîl de govende girewte û keyf kerd. Kilamî û sloganî eştî û peynî de ameyî girotiş. Badê çend rocan binê çimî de tepişîyayî. Slogan zî hetê qanûnî ra suc nîyo, tespît bîyo la reyna zî mesela bêro şarê kurdî ser suc beno.

Dinya zana ku slogano ku ame eştiş suc nîyo (Bijî Serok Apo).  Şarê kurdî de hesreta ziwanê xo çandê xo yo. Bi serrano kurdî ziwanê xo de û çandê xo ser o nêeşkenê biciwîyê. Eger ti bi ziwanê îngilîzî, erebî yan zî weku bîn ziwanan de kilame vacê û goştarî bikerê, problem çin o. Tenê mîyanê nê ziwanan de şarê kurdî rê ziwanê kurdî qedexe yo. Wazenê asîmîle ziwsnî ser o bikerê. Nê semedî ra wexto ku gencan genê binê çimî, rayir de înan rê bi nameyê “Ölürüm Türkiyem” kilaman akenê û zulmê psîkolojîkî kenê.

Nima zerreyê nê gencan de çîyêk çin o. Hêrs û (kîn) la bi na rewşe hersê gencan zêde beno. Merdim nê çîyan qebul nêkeno, sosret o. Eger bi tenê kurdî ser o, şarê kurdî ser o no zulm beno, ganî dinya nê çî rê veng veco û qebul nêkero. Ma pêro pîya wayîrê ziwanê xo, çandê xo bivecîyê. Her merdim kokê xo ser o, her merdim ziwanê xo ser o, her merdim axê xo ser o eşkeno biciwîyo û kes nêeşkeno vernîya înan bigero. Merdim bi çi bêro naskerdiş, nêeşkenê înkar bikerê. Kurdî bi ziwanê xo û bi çandê xo yenê naskerdiş.

Çiqa vernîya înan bigêrê, hende zêde benê. Kes nêvano wa tirkî bibê kurd, ziwanê tirkî bibo kurdî. Her kes bi ziwanê xo biciwîyo û bi ziwanê xo nas bibo. Merdim eşkeno nê rewşan ser o xeylêk çîyan vaco, la bi serrano ma vînenê dest erzenê ziwan û çandê ma, wazenê ma çin bikerê.

Gere merdim sere de bizano ku xeletîye çi ya yanî suc çi yo û goreyê kamî suc yeno vatiş. Eger kurd bo, her çî suc o la kurd nêbo wazeno wa se bikero suc nîyo. Jo tirk eşkeno kilamanê kurdî goştari bikero o çax mesela çin a, la wexto ku kurd bi ziwanê xo goştarî bikero suc o.

Destanê xo gencanê ma ser o wedarê, vernîya înan akerê. Kes nêwazeno gencî mîyanê xirabî de bimanê, raya xirabe de şerê. Gencî wa xo nas bikerê, çand û ziwanê xo ser o biciwîyê. Tenê gencî nê, her merdimî rê no çî esas o, sere de gencan rê ferzo. Dare kokê xo ser o şên bena, merdim zî bi ziwan û çandê xo ser o ciwîyeno.