Parlamentera HEDEPî ya Bedlîsî Semra Çaglar Gokalpe îfade kerd ke Bedlîs de şar mecbûr maneno ke koç bikero û wina vat: “Dewan de merdimê 80 serrî yenê destbendkerdene, herêmî yenê qedexekerdene, karê heywankarî û zîretî yenê qedexekerdene û xoza yena çinkerdene.”

Nêzdîyê 5 mengî yo qezayanê Xîzan û Tetwanî de qedexeyê vejîyayîş û dekewtişî est ê, operasyonê sîyasî û leşkerîyî yenê kerdene. Tewr peyên 28ê teşrîna peyêne de domanî zî tede 110 kesî şaristan de ameybî destbendkerdene û nînan ra 50 kesî tepişîyayî.

Dewanê Hûzeran, Akûnis, Govan, Lanîlan, Xûlepûr, Kekulan, Sûreh, Pertawan, Kuran û Mezra Pisyanî yê Xîzanî de 2yê temmuze de qedexeyê tebervejîyayîşî ame îlankerdene û dima hêrişanê leşkerîyan dest pêkerd. Tetwan de dewa Peyîndasî de 10ê tebaxe de ablûqa ameye îlankerdene, 5 dewijî bi îşkenceyî ameyî destbendkerdene.

Parlamentere Gokalpe bale ante ser ke Tetwan û Xîzan kelayê xoverdayîşî yê coka raştê hêrişanê dewleta tirke yenê. Gokalpe wina vat: “Tarîxê Komara Tirkîya yê 10 serran mojneno ke meseleya kurdan bi şerî çareser nêbena. Sere de dewanê Gûlpik û Peyîndasî de hamnanî ra nata dewijanê Tetwan û Xîzanî rê zulm yeno kerdene. Merdimî nêeşkenê şorê bax û baxçeyanê xo û heywananê xo weye bikerê. Leşkerî nînan talan kenê, daran birnenê. Rewşêka winayêne de asayîşê gan û malê merdiman çin o. Cuya ke îqtîdarê AKP-MHPyî kurdan rê rewa vîneno na ya.”

Parlamentere Gokalpe dîyar kerd ke seba ke kurdî wareyanê xo biteriknê wina înan rê zulm yeno kerdene û vat: “Dewan de merdimê 80 serrî yenê destbendkerdene, herêmî yenê qedexekerdene, karê heywankarî û zîretî yenê qedexekerdene û xoza yena çinkerdene. Bi nê hawayî zî merdiman rê koçkerdiş yeno ferzkerdene. Dewlete