Kovara wêneromanî ya zarokan a bi kurdî ya yekemîn GOG, bi awayekî dîjîtal dest bi weşana xwe kir. Kovara bi zaravayên kurdî kurmancî û kirmanckî ye, navê xwe ji lîstikeka zarokan a berê girtiye û xwedî naverokeke dewlemend û cihêreng e. GOG a ji bo zarokên temenê wan di navbera 7-14’an de ye, wê mehê carekê derbikeve.
Kovara GOG’ê bi karakterên xwe jî balê dikişîne. Karakterên navdar ên mîna kowboy Red Kît, çermsorê biçûk Yakarî, Thorgalê yê li nav vîkîngan ji bo malbata xwe biparêze ji ji neçarî şer dike û her wiha çîroka Milo heye.
Karakterên cur bi cur hene
Di kovarê de, xêzkar Dogan Guzel ‘Qirix’, Ender Ozkahraman ‘Çîrokên Wê Derê’, Îmam Cîcî zincîreya ‘Ev Kî Ye?’, Evdal Can jî çîroka Şahmaranê xêz kirine. Her wiha di nav karakteran de karaktera ‘Porsor’ jî heye.
Çîrokên zanyar û hunermendan
Di hejmara yekê ya kovara GOG’ê de hunermendê navdar ê îsraîlî Asaf Hanuka jî bi çîrokekê piştgirî daye kovarê. Çîrokên mirovên zanyar û hunermendan, dahurandina karakterên wêneromanî û nûçeyên zanist û hunerê jî GOG dewlemend û rengîntir kiriye.
Ji bo zarokên kurdan
Gerînendeyê weşana giştî yê kovara GOG’ê Îmam Cîcî, da zanîn ku wan bi GOG’ê xwestiye alternatîfekê pêşkêşî zarokên kurdan bikin ku ji perwerdeya zimanê xwe kurdî bêpar in. Cîcî got ku kovara GOG’ê ji bo nivîskar û xêzkarên kurd jî platfromeke serbixwe ye.
Îmam Cîcî destnîşan kir ku wan hejmara yekê ya GOG’ê bi awayekî dîjîtal amade kiriye lê wê piştî demekê bi awayê kaxidî jî derbikeve.
Kovara GOG’ê 48 rûpel e û kesên bixwazin dikarin wê li ser malpera www.gog-weneroman.com’ê peyda bikin. AMED
