Hevseroka Kongreya Civaka Demokratîk Leyla Guven, hevseroka HDP’ê ya berê Fîgen Yuksekdag, hevşaredara berê ya Amedê Gultan Kişanak, hevşaredara berê ya Dersimê Nûrhayat Altûn, parlamenterên berê Gulser Yildirim û Edîbe Şahîn, hevseroka berê ya Partiya Herêmên Demokratîk (DBP) Sebahat Tuncel, aktîvîsta Tevgere Jinen Azad (TJA) Ayla Akat Ata, siyasetmedarên jin Zeynep Karaman, Aynûr Aşan, Zeynep Olbeci, Pervîn Oduncu, Meryem Adîbellî, Dîlek Yagcı, Ayşe Yagci û Bircan Yorulmaz ji Kongreya Mezin a Asayî ya 5’emîn a HDP’ê re peyam şandin. Di heman demê de Selahattîn Demîrtaş û Selçûk Mizrakli peyameke hevpar şandin.

Fîgen Yuksekdag, Gultan Kişanak, Nurhayat Altun, Gulser Yildirim û Edîbe Şahîn ku di Girtîgeha Tîpa F ya Kandrayê de tên girtin ji 5’emîn Kongreya Mezin a Asayî ya  Partiya Demokratîk a Gelan (HDP)  re peyam şandin.  Peyama jinên siyasetmedar ên girtî wiha ye: “Silav, rêhevalên hêvî, azadî, aştî, edalet, ked, xweza û berxwedana ku mirovan dike mirov! Em we bi dilgermî silav dikin, can û dostên me yên hêja ku di vê cejna mezin a demokrasiyê de bi derbaskirina hemû astengî û êrîşên hovane hatin gel hev. Em dizanin ku dengê we yê bilind, vîna we dê hemû qeflan veke. Li hemberî esareta Birêz Ocalan ê li Îmraliyê di tecrîdê de ye, hûnê weke qêrîna azadiyê ya bi hezaran girtiyên siyasî yên di zindanan de biherikin. Helbet edalet wê bi têkoşînê pêk were. Bi vê hêvî û baweriyê em we hemûyan careke din û bi dil û can silav dikin.”

Peyama Leyla Guven

Leyla Guven ji Girtîgeha Girtî ya Tîpa E ya Xerpêtê ku lê girtî ye, peyamek ji Kongreya HDP’ê re şand. Leyla di peyama ku bi rêya parêzerên xwe şandiye de wiha got:“Em weke 9 jinên kurd ên li Zindana Xarpûtê, we bi rêzdarî silav dikin û li ber berxwedana we ya destanî û vîna we ya xurt a li dijî faşîzmê bi rêzdarî bejna xwe ditewînin. Tevî kesên ku nekarîn bi HDP’ê çok bidin tewandin, em hêvîdar in ku kongreya me ya ku hûn bi deh hezaran li hev civiyan bi serkeve û ji we re serketinê di her warî de dixwazin.

Divê em pir aşkere bibêjin ku; ne hewcedariya gelê kurd bi polîtîkayên tunekirinê yên AKP-MHP’ê heye, ne jî bi nêzîkatiya tirsonek,  ya pêkhateyên maseya sê ling ên ku dixwazin desthilatdariyê bikin heye. Em dizanin ku partiya me HDP wê di hilbijartinan de bi tedbîr tevbigere û bi helwesta xwe ya stratejîk bersiva herî baş bide her kesî.”

“Serkeftin ji her kesî re”

Tecrîda ku bi Birêz Abdullah Ocalan hat destpêkirin li hemû girtîgehan û li hemû beşên civakê belav bû; Dem dema hesabpirsîna ji vê rejîma faşîst a ku kurd, mûxalîf, jin, kedkar, bi kurtasî her kesê ku li mafên xwe digere, weke ‘terorîst’ tê îlankirin e. Gelê me yê rêzdar, bêyî ku bêhêvî bin, em ê li her qadê hev hembêz bikin û bi pêşengiya jinan bi hev re bimeşin. Ber bi deşta ku feqîrî, bindestî, zulm û bêhiqûqî lê tune ye… Werin em bi zindîhiştina gotina ku dibêje ‘hêvî ji serketinê biqîmettir e’ rêya xwe bidomînin. Serkeftin ji her kesî re.”

Jinên li Sîncanê silav û hezkirinên xwe şandin

Sebahat Tuncel, Ayla Akat Ata, Zeynep Karaman, Aynur Aşan, Zeynep Olbecî, Pervîn Oduncu, Meryem Adîbellî, Dîlek Yagli li Girtîgeha Jinan a Sîncanê hatin girtin. , Ayşe Yağci û Bircan Yorulmaz jî ji bo kongreya HDPê peyam şandin. Peyama jinên girtî wiha ye: “Meclisa hêja, delegeyên kongreyê yên birêz, gelê me yê hêja, dost û hevrêyên hêja; Em we hemûyan bi berxwedan û coşa têkoşîna xwe û bi bedewiya rêhevaltiya jinan silav dikin. Em di wê baweriyê de ne ku kongreya me wê ji bo çareseriya pirsgirêkên siyasî, aborî û civakî yên gelên Kurdistan û Tirkiyeyê, jin û kedkaran bibe îrade û îradeya avakirina jiyana demokratîk, ekolojîk û azadiya jinê nîşan bide.

Em ê jiyana nû bi hev re, hûn li derve û em li hundir, bi berxwedan û têkoşînê ava bikin. Em silav û hezkirinên xwe pêşkêşî hemû rêhevalên xwe, gelê me yê ku ji roja damezrandina HDP’ê heta niha ked dane û ji bo pêşeroja xwe bi destên xwe ava bikin, dikin û serketinê ji hevserokên xwe û hemû hevalên xwe re dixwazin. Silav û hezkirin.”

Selahattîn Demîrtaş û Selçûk Mizrakli jî peyameke hevpar şandin

Herdu siyasetmedaran beşdar silav kirin û destnîşan kirin ku HDP wê bi vê kongreyê re hîn bi xurtî meşa xwe dewam bike.

Di peyama hevpar de hate gotin, “Em ê ji zindanan bibin deng ji têkoşîna gelê xwe re. Di pirtûka me de teslîmbûn, serîtewandin, têkçûn nîne. Ji bo têkbirina desthilatdariya zilmê, ji bo pêkanîna aştî, demokrasî û azadiyê em ehta dawiyê li ber xwe didin. Em ê bi partiya xwe, gelê xwe dest bi dest, dil bi dil vê têkoşînê bi serketinê tacîdar bikin.”